PUNCTUM III. De patrinis et eorum munere.

31. Munus patrinorum.

32. Qualitas.

33. Quando et a quibus contrahitur cognatio, etc.

34. An parentes, etc.

35. An patrini debeant designari.

36. Cuius sexus.

37. Quibus sit vetitum esse patrinos.

38. Quando in hoc peccat parochus.

31. Patrini sunt illi qui de sacro fonte suscipiunt baptizatum, et in suam curam eum accipiunt; unde debent eum instruere de rebus Fidei, et morum, si alii negligunt. Caeterum dicit s. Thom.¹, quod potissimum praesumere possunt patrini, infantes sufficienter instrui a suis parentibus².

32. Ad hoc, ut quis possit esse patrinus, dicunt Salm. cum Laym. Sanch. Nav. etc. nullam requiri certam aetatem: sed probabiliter tenet Croix, requiri saltem aetatem 7. annorum; omnino autem requiritur 1. rationis usus, 2. ut sit baptizatus, 3. ut patrinus talem habeat intentionem, 4. ut ipse per se, aut medio procuratore suscipiat infantem qui baptizatur, aut e manibus baptizantis, et in hoc non sufficit tactus moralis, sed requiritur physicus, iuxta communissima sententiam Sanch. Castropal. Bonac. Salm. etc. cum declaratione S. C.³: 5. ut patrinus sit designatus a parentibus, vel saltem a parocho: sed parochus (saltem licite) non potest mutare patrinum designatum a parentibus⁴.

33. Quaeritur 1. an in Baptismo privato contrahatur tam a baptizante, quam a patrino spiritaulis cognatio? Quoad baptizantem, non dubitatur quin contrahatur. Sed quoad patrinum, negant communis, et probabilius Sot. Sanch. Castropal. Bonac. Tourn. Salm. etc. (contra Suarez Laym. etc.): quia iuxta Trident. Sess. 24. c. 2. de Ref. impedimentum dumtaxat contrahitur ab illis qui de sacro fonte puerum suscipiunt: et hic fons tantum pro solemni, non autem privato Baptizmo institutus est⁵. Quaeritur 2. an cognationem contrahat, qui pro patrino adhibetur in Baptismo sub conditione collato? Respondetur quod si de priori Baptismo tantum habeatur dubium negativum, tunc certum est contrahi: nam cum nulla habetur ratio pro illius valore, praesumptio stat pro valore posterioris. Secus autem si de priori dubium habeatur positivum, nempe probabilis ratio de illius validitate; ita Sanch. Dian. et Ren.⁶. Quaeritur 3. an contrahat, qui ex errore suscipit unum puerum pro alio quem intendebat? Negant Sanch. Tourn., etc. ex cap. 2. de Cognatione spirit. ubi dicitur mulier, quae ex ignorantia filium mariti suscipit in Baptismo, non privari iure petendi debitum. Sed probabilius affirmant Pontius Castr. et alii: modo patrinus non habeat expressam intentionem non levandi alium infantem, quam eum quem intendit. Et respondet ad textum oppositum quod ibi lex aufert impedimentum petendi debitum, quia aequum non erat privare sine sua culpa coniugem suo iure: sed haec ratio non currit in nostro casu⁷. Quaeritur 4. cum aliquis levat puerum alterius nomine, qui eorum contrahit cognationem? Aliqui dicunt solum procuratorem contrahere ita Sotus Conc. et Tolet. Alii dicut neutrum; ita Filliuc. Sa etc.; sed communissima sententia et verior Sanchez Castropal. Fagnani Navar. Tourn. Croix, et aliorum cum Pontio, qui affert Decisionem S. C., est solum principalem contrahere; quia iuxta Trident. ille cognationem contrahit, qui a parentibus ad puerum suscipiendum designatus fuit. Nec refert quod principalis absit, quia iuxta regulam legis: Qui per alium facit, per se facere videtur8.

34. Quaeritur 5. an parentes baptizantes, aut filios de Baptismo suscipientes, contrahant impedimentum petendi debitum? Certum est 1. non contrahere, si baptizant in necessitate, ut docent communiter dd. cum s. Thoma⁹. Certum est 2. peccare

graviter parentes, qui sine necessitate baptizant filios¹. Certum est 3. non contrahere parentes, qui baptizant ex ignorantia filium, ex cap. Si vir 2. de cognat. spir. Quaestio igitur restat an parentes filium sine necessitate baptizantes contrahant impedimentum, etc.? Affirmant Sanch. Petroc. Conc. cum s. Thoma², quia eadem lex quae decernit contrahi cognationem inter baptizantem, et parentes baptizati, inducit etiam impedimentum inter parentes qui prolem baptizant. Sed satis probabiliter negant Suar. Viva Salm. Coninc. cum Glossa in praefato c. 2. v. Debitum, quia in nulla lege id invenitur expressum, et nulla poena incurritur nisi sit expressa in iure, ut concordant omnes; imo in eodem textu dicitur quod huiusmodi coniuges nons unt separandi, et additur: Nec alter alteri debitum debet subtrahere. Nec valet dicere textum loqui de redditione, non autem de petitione; dum si alter non posset petere, alter non teneretur reddere; dum ille amisit ius petendi³.

35. Quaeritur 6. an patrini, ut contrahant cognationem, debeant esse designati, et a quo? Circa hoc Trident. Sess. 24. c. 2. statuit: Si alii ultra designatos baptizatum tetigerint, cognationem spiritualem nullo pacto contrahent. Hic dubitatur 1. cum multi tangunt puerum, sed nullus est designatus, an omnes contrahant? Alii dicunt tunc nullum eorum contrahere; ita Croix Gob. Dian., etc. Sed ego adhaereo sententiae contrariae quae est communissima Nav. Laym. Castrop. Bonac. Salm. viva, etc. cum declaratione S. C. qua dictum fuit omnes contrahere, quia licet Concilium requirat ut parochus baptizet adhibitis patrinis designatis a parentibus pueri, attamen non irritat ius antiquum cap. fin. de Cogn. spir. in 6. quo omnes qui tangunt, cognationem contrahunt: ibi sic dicitur: Si tamen plures accesserint, spiritualis cognatio inde contrahitur; et hoc currit, ut dicunt Castr. Corn. Salmantic, etc. adversus Croix, etiamsi praesentes sint patrini designati. Sed si quis ex patrinis designatis puerum tangeret, caeteri non designati certe non contrahunt, ut habetur ex Concilio. Sed si parentes designarent plures quam duos patrinos, et omnes tangeret (in quo graviter peccaret parochus, eos admittendo contra Concilii praeceptum), tunc recte dicunt Suar. Sanch. et Croix, quod si successive tangerent, illos duos priores contrahere: sed si omnes una simul, Suar. tenet neminem contrahere; sed probabilius dicunt Sanch. Ronc. Castropal. Salm. Croix, etc. omnes desigantos contrahere: quia Concilium non irritat ius antiquum, nisi cum tangunt alii non designati, praeter duos designatos; sed secus si tangunt alii designati ultra duos. Et hoc tanto magis currit, ut declaravit S. C. si de multis designatis nescitur quis eorum prius tetigerit⁴.

36. Notandum 1. Concilium praescribere, ut duorum patrinorum alter sit mas, et alter foemina; unde non vacaret culpa designare duos mares, aut duas foeminas; et ego puto lethale cum Bonac. et aliis (contra Sanch. et Croix), si uterque patrinus esset diversi sexus quam infans; quia ita multiplicarentur cognationes contra finem Concilii, et in hoc materia est gravis. Si autem designaretur unus tantum patrinus, nihil refert an sit diversi sexus, ut dicunt probabilius Suar. Filliuc. Gobat. et Aversa (contra Laym.), dum Concilium dicit, sive vir sive mulier⁵.

37. Notandum 2. non licere esse patrinos 1. monachis, et monialibus, et Regularibus cuiuscumque ordinis, ut declarat Rit. rom. (tit. de Patr. in Bapt.) cum dicatur ibi: Admitti non debent monachi et sanctimoniales, neque alii cuiusvis ordinis regulares

a saeculo segregati. Intelligitur hoc de suscipiendo non autem de baptizando. 2. Vetitum est haereticis, apostatis et infamibus. Quare peccant, quia advocant haereticos pro patrinis suorum filiorum. Contra licite possunt Catholici in baptismo suscipere pueros haereticorum, modo hac re non probetur eorum ritus; Laym. Croix Gob.¹. 3. Prohibitum est coniugi esse patrinum alterius coniugis: et parentibus respectu filiorum praeterquam in necessitate. 4. Prohibitum est esse patrinos plures duobus, cum dicat Trid. Sess. 24. c. 2. de Ref.: Sive vir sive mulier, vel ad summum unus et una. Non est vetitum quin duo coniuges unam prolem alterius suscipiant, ut communiter dd. cum s. Thoma², qui dicit: Nihil prohibet quin vir et uxor aliquem de sacro fonte levarent3.

38. Notandum 3. peccare parochum 1. si respuit patrinos a parentibus designatos, aut admittit ab illis non electos; 2. si admititt plures quam duos. 3. si baptizat sine patrino⁴. In Baptismo privato tamen non adest obligatio adhibendi patrinos, iuxta communem sententiam; caeterum probabile est etiam in privato licite posse adhiberi patirnos.⁵.