PUNCTUM VII. Quomodo se gerere debeaat cum moribundis?

46. Confessarius in excipiendis moribundorum confessionibus non debet tam exacte procedere circa numerum et circumstantias; praesertim si iam accessisset sacerdos cum Viatico, aut si medicus instaret, ut cito Viaticum suscipiatur; tunc enim melius est ad dispositionem poenitentis, qum ad confessionis integritatem attendere. Sufficit tunc imponere infirmo, ut, cum convaluerit, confessionem repetat. Et satisfactio sit levissima, imponendo proportionatam pro tempore quo ille convalescet; vel satis erit ei iniungere ut redeat tempore sanitatis. Vulnerati, et puerperae, quae ordinarie nequeunt ab assistentibus deseri, sufficit ut se accusent generice de suis peccatis, et in particulari de aliqua culpa levi, cum proposito integre confitendi si convalescant. Advertat confessarius, quod si moribundus tenetur ad aliquam restitutionem, quam valeat tunc implere, ei imponere debet ut statim faciat; et non sufficit, quod de illa onus haeredibus relinquat, alias eum non absolvat.

47. Si autem infirmus notabilissimam, subiturus esse perturbationem animi, in audiendo quod debeat Viaticum accipere, probabile est posse parochum Eucharistiam ei praebere, reticendo solita verba: Accipe, frater, Viaticum, etc., sed proferendo ordinaria verba Communionis: Corpus Domini nostri Iesu Christi custodiat, etc. Vide dicta Tr. 15., n. 50. Si deinde confessarius adverteret moribundum

iam esse in statu, quo teneretur suscipere Extremam-Unctionem, et ille respueret, patefaciat ei magnos effectus huius Sacramenti, quod grandem praestat animae fortitudinem ad obstinendum in ultimo agone daemonum tentationibus; eam solvit a culpis venialibus, et etiam mortalibus, si occultae sint; et insuper sanitatem adhuc corporis confert, cum animae saluti expedit: sed hanc sanitatem non praebet, si moribundus eo devenit, ut nequeat amplius nisi per miraculum convalescere: quia Sacramentum per viam ordinariam tantum operatur, causas naturales coadiuvando. Si vero, hoc non obstante, infirmus non acquiesceret, et pergeret nolle ungi, valde probabiliter plures dd. docent eum lethaliter peccare, saltem adversus charitatem erga seipsum, cum ultro se privet tanto auxilio in tanta necessitate.