PUNCTUM II. Effectus irregularitatis.

75. Effectus.

76. An irregularis possit acceptare beneficia.

77. An possit accepta retinere.

75. Irregularitas 1. inhabilem reddit ad suscipiendos Ordines, etiam primam Tonsuram, ut communiter dd. 2. Impedit exercitium iam susceptorum, cap. fin. de Temp. Ord. ideoque irregularis illicite, sed valide absolveret, etc. 3. Impedit a recipiendis beneficiis.

76. Sed quoad beneficia, quaeritur 1. an nulla sit collatio beneficii facta irregulari, qui est inhabilis ad functiones ipsius beneficii? Sententia communior, et probabilior affirmat, et proabtur ex c. 2. de Cleric. non ord. ministr. et praesertim ex Trident. sess. 22. cap. 4. de ref. ubi dicitur: Nec aliis in posterum fiat provisio, nisi iis, qui iam aetatem, et caeteras habilitates integre habere dignoscantur; aliter irrita sit provisio. Et ratio est quia beneficium datur propter officium, et qui est inhabilis ad Ordinis iam suscepti exercitium, debet iudicari eitam inhabilis ad beneficium; ita dicunt Suar. Bon. Tourn. Cabass. Salm. cum aliis multis. Oppositam sententiam defendunt Innoc. Silv. Laym. Viva, Elbel. Roncag. Diana, et Salm. cum Felin. Anchar. Giball. et idem Suar., sicut etiam Bus. recte eam vocant probabilem; quia non est imponenda poena, ubi nulla lex expressa habetur, et cum nullus adsit textus evidens qui declaret irregularem incapacem beneficiorum, ideoque dicunt Suarez, Tourn. Bon.¹, quod licet peccet graviter in recipiendis, aut in retinendis illis sine dispensatione, tamen si per alios satisfecit beneficii oneribus, non tenetur ad restitutionem. Et respondet ad Canones, quod ipsi illicitam declarant beneficii collationem irregularibus, non autem invalidam, et ad Tridentinum repsondent, dicendo quod ibi invalida declaratur collatio facta inhabilibus, sed tales non reputantur irregulares quoad validitatem. Sed hic advertendum quod licet haec sententia sit probabilis, tamen quia prima etiam est probabilior, stante communiori sensu dd. qui, ut ait Laym. est optimus interpres legum, qui ita interpretati sunt textus supra citatos, non potst ideo in beneficii possessionem alterius rei se ingerere². Sed contra si bona fide beneficium accepisset, obtenta dispensatione, potest illud retinere, quin in dispensationis petitione mentio facta esset de beneficio³.

77. Quaeritur 2. an irregularis iuxta praefatam sententiam possit sibi retinere beneficium? Quoad beneficia prius obtenta, nulli dubium est, quin possit; nec debet eis a iudice privari, si irregularitas provenit ex infirmitate, uti habetur ex c. Ex parte, de Cler. aegrot. Sed si irregularitas proveniret ex delicto, debebit privari a iudice; sed interim, nisi dispensationem obtineat, debet aut illud renuntiare, aut resignare saltem in favorem tertii; quia qui non potest licite beneficii oneribus satisfacere, nec potest licite illud sibi retinere; ita Suar. Castr. cum multis aliis⁴.