HYMN 48

saha vAmena na uSo vyuchA duhitardivaH
saha dyumnena bRhatA vibhAvari rAyA devi dAsvatI
ashvAvatIrgomatIrvishvasuvido bhUri cyavanta vastave
udIraya prati mA sUnRtA uSashcoda rAdho maghonAm
uvAsoSA uchAcca nu devI jIrA rathAnAm
ye asyA AcaraNeSu dadhrire samudre na shravasyavaH
uSo ye te pra yAmeSu yuñjate mano dAnAya sUrayaH
atrAha tat kaNva eSAM kaNvatamo nAma gRNAti nRNAm
A ghA yoSeva sUnaryuSA yAti prabhuñjatI
jarayantI vRjanaM padvadIyata ut pAtayati pakSiNaH
vi yA sRjati samanaM vyarthinaH padAM na vetyodatI
vayo nakiS Te paptivAMsa Asate vyuSTau vAjinIvati
eSAyukta parAvataH sUryasyodayanAdadhi
shataM rathebhiH subhagoSA iyaM vi yAtyabhi mAnuSAn
vishvamasyA nAnAma cakSase jagajjyotiS kRNoti sUnarI
apa dveSo maghonI duhitA diva uSA uchadapa sridhaH
uSa A bhAhi bhAnunA candreNa duhitardivaH
AvahantI bhUryasmabhyaM saubhagaM vyuchantI diviSTiSu
vishvasya hi prANanaM jIvanaM tve vi yaduchasi sUnari
sA no rathena bRhatA vibhAvari shrudhi citrAmaghe havam
uSo vAjaM hi vaMsva yashcitro mAnuSe jane
tenA vaha sukRto adhvarAnupa ye tvA gRNanti vahnayaH
vishvAn devAnA vaha somapItaye.antarikSAduSastvam
sAsmAsu dhA gomadashvAvadukthyamuSo vAjaM suvIryam
yasyA rushanto arcayaH prati bhadrA adRkSata
sA no rayiM vishvavAraM supeshasamuSA dadAtu sugmyam
ye cid dhi tvAM RSayaH pUrva Utaye juhUre.avase mahi
sA na stomAnabhi gRNIhi rAdhasoSaH shukreNa shociSA
uSo yadadya bhAnunA vi dvArAv RNavo divaH
pra no yachatAdavRkaM pRthu chardiH pra devi gomatIriSaH
saM no rAyA bRhatA vishvapeshasA mimikSvA samiLAbhirA
saM dyumnena vishvaturoSo mahi saM vAjairvAjinIvati