HYMN 91

tvaM soma pra cikito manISA tvaM rajiSThamanu neSi panthAm
tava praNItI pitaro na indo deveSu ratnamabhajanta dhIrAH
tvaM soma kratubhiH subhUstvaM dakSaiH sudakSo vishvavedAH
tvaM vRSA vRSatvebhirmahitvA dyumnebhirdyumnyabhavo nRcakSAH
rAjño nu te varuNasya vratAni bRhad gabhIraM tava soma dhAma
shuciS Tvamasi priyo na mitro dakSAyyo aryamevAsisoma
yA te dhAmAni divi yA pRthivyAM yA parvateSvoSadhISvapsu
tebhirno vishvaiH sumanA aheLan rAjan soma pratihavyA gRbhAya
tvaM somAsi satpatistvaM rAjota vRtrahA
tvaM bhadro asi kratuH
tvaM ca soma no vasho jIvAtuM na marAmahe
priyastotro vanaspatiH
tvaM soma mahe bhagaM tvaM yUna RtAyate
dakSaM dadhAsi jIvase
tvaM naH soma vishvato rakSA rAjannaghAyataH
na riSyettvAvataH sakhA
soma yAste mayobhuva UtayaH santi dAshuSe
tAbhirno.avitA bhava
imaM yajñamidaM vaco jujuSANa upAgahi
soma tvaM novRdhe bhava
soma gIrbhiS TvA vayaM vardhayAmo vacovidaH
sumRLIkona A visha
gayasphAno amIvahA vasuvit puSTivardhanaH
sumitraH somano bhava
soma rArandhi no hRdi gAvo na yavaseSvA
marya iva svaokye
yaH soma sakhye tava rAraNad deva martyaH
taM dakSaH sacate kaviH
uruSyA No abhishasteH soma ni pAhyaMhasaH
sakhA susheva edhi naH
A pyAyasva sametu te vishvataH soma vRSNyam
bhavA vAjasya saMgathe
A pyAyasva madintama soma vishvebhiraMshubhiH
bhavA naHsushravastamaH sakhA vRdhe
saM te payAMsi samu yantu vAjAH saM vRSNyAnyabhimAtiSAhaH
ApyAyamAno amRtAya soma divi shravAMsyuttamAni dhiSva
yA te dhAmAni haviSA yajanti tA te vishvA paribhUrastuyajñam
gayasphAnaH prataraNaH suvIro.avIrahA pra carA soma duryAn
somo dhenuM somo arvantamAshuM somo vIraM karmaNyaM dadAti
sAdanyaM vidathyaM sabheyaM pitRshravaNaM yo dadAshadasmai
aSALhaM yutsu pRtanAsu papriM svarSAmapsAM vRjanasyagopAm
bhareSujAM sukSitiM sushravasaM jayantaM tvAmanu madema soma
tvamimA oSadhIH soma vishvAstvamapo ajanayastvaM gAH
tvamA tatanthorvantarikSaM tvaM jyotiSA vi tamo vavartha
devena no manasA deva soma rAyo bhAgaM sahasAvannabhi yudhya
mA tvA tanadIshiSe vIryasyobhayebhyaH pra cikitsA gaviSTau