HYMN 135

stIrNaM barhirupa no yAhi vItaye sahasreNa niyu=tA niyutvate shatinIbhirniyutvate | tubhyaM hi pUrvapItaye devA devAya yemire
pra te sutAso madhumanto asthiran madAya kratve asthiran
tubhyAyaM somaH paripUto adribhi spArhA vasAnaH pari koshamarSati shukrA vasAno arSati | tavAyaM bhAga AyuSusomo deveSu hUyate
vaha vAyo niyuto yAhyasmayurjuSANo yAhyasmayuH
A no niyudbhiH shatinIbhiradhvaraM sahasriNIbhirupa yAhi vItaye vAyo havyAni vItaye | tavAyaM bhAga RtviyaH sarashmiH sUrye sacA
adhvaryubhirbharamANA ayaMsata vAyo shukrA ayaMsata
A vAM ratho niyutvAn vakSadavase.abhi prayAMsi sudhitAni vItaye vAyo havyAni vItaye | pibataM madhvo andhasaH pUrvapeyaM hi vAM hitam
vAyavA candreNa rAdhasA gatamindrashca rAdhasA gatam
A vAM dhiyo vavRtyuradhvarAnupemaminduM marmRjanta vAjinamAshumatyaM na vAjinam | teSAM pibatamasmayU A no gantamihotyA
indravAyU sutAnAmadribhiryuvaM madAya vAjadA yuvam
ime vAM somA apsvA sutA ihAdhvaryubhirbharamANA ayaMsata vAyo shukrA ayaMsata | ete vAmabhyasRkSata tiraH pavitramAshavaH
yuvAyavo.ati romANyavyayA somAso atyavyayA
ati vAyo sasato yAhi shashvato yatra grAvA vadati tatra gachataM gRhamindrashca gachatam
vi sUnRtA dadRshe rIyate ghRtamA pUrNayA niyutA yAtho adhvaramindrashca yAtho adhvaram
atrAha tad vahethe madhva AhutiM yamashvatthamupatiSThanta jAyavo.asme te santu jAyavaH
sAkaM gAvaH suvate pacyate yavo na te vAya upa dasyanti dhenavo nApa dasyanti dhenavaH
ime ye te su vAyo bAhvojaso.antarnadI te patayantyukSaNo mahi vrAdhanta ukSaNaH | dhanvañcid ye anAshavo jIrAshcidagiraukasaH
sUryasyeva rashmayo durniyantavo hastayordurniyantavaH