HYMN 141

baL itthA tad vapuSe dhAyi darshataM devasya bhargaH sahaso yato jani
yadImupa hvarate sAdhate matirRtasya dhena anayanta sasrutaH
pRkSo vapuH pitumAn nitya A shaye dvitIyamA saptashivAsu mAtRSu
tRtIyamasya vRSabhasya dohase dashapramatiM janayanta yoSaNaH
niryadIM budhnAn mahiSasya varpasa IshAnAsaH shavasAkranta sUrayaH
yadImanu pradivo madhva Adhave guhA santaM mAtarishvA mathAyati
pra yat pituH paramAn nIyate paryA pRkSudho vIrudho daMsu rohati
ubhA yadasya januSaM yadinvata Adid yaviSTho abhavad ghRNA shuciH
Adin mAtR^IrAvishad yAsvA shucirahiMsyamAna urviyAvi vAvRdhe
anu yat pUrvA aruhat sanAjuvo ni navyasISvavarAsu dhAvate
Adid dhotAraM vRNate diviSTiSu bhagamiva papRcAnAsa Rñjate
devAn yat kratvA majmanA puruSTuto martaM saMsaM vishvadhA veti dhAyase
vi yadasthAd yajato vAtacodito hvAro na vakvA jaraNA anAkRtaH
tasya patman dakSuSaH kRSNajaMhasaH shucijanmano raja A vyadhvanaH
ratho na yAtaH shikvabhiH kRto dyAmaN^gebhiraruSebhirIyate
Adasya te kRSNAso dakSi sUrayaH shUrasyeva tveSathAdISate vayaH
tvayA hyagne varuNo dhRtavrato mitraH shAshadre aryamA sudAnavaH
yat sImanu kratunA vishvathA vibhurarAn na nemiH paribhUrajAyathAH
tvamagne shashamAnAya sunvate ratnaM yaviSTha devatAtiminvasi
taM tvA nu navyaM sahaso yuvan vayaM bhagaM na kAremahiratna dhImahi
asme rayiM na svarthaM damUnasaM bhagaM dakSaM na papRcAsi dharNasim
rashmInriva yo yamati janmanI ubhe devAnAM shaMsaM Rta A ca sukratuH
uta naH sudyotmA jIrAshvo hotA mandraH shRNavaccandrarathaH
sa no neSan neSatamairamUro.agnirvAmaM suvitaM vasyo acha
astAvyagniH shimIvadbhirarkaiH sAmrAjyAya prataraM dadhAnaH
amI ca ye maghavAno vayaM ca mihaM na sUro atiniS TatanyuH