HYMN 3

samiddho agnirnihitaH pRthivyAM pratyaM vishvAni bhuvanAnyasthAt
hotA pAvakaH pradivaH sumedhA devo devAn yajatvagnirarhan
narAshaMsaH prati dhAmAnyañjan tisro divaH prati mahnA svarciH
ghRtapruSA manasA havyamundan mUrdhan yajñasya samanaktu devAn
ILito agne manasA no arhan devAn yakSi mAnuSAt pUrvo adya
sa A vaha marutAM shardho acyutamindraM naro barhiSadaM yajadhvam
deva barhirvardhamAnaM suvIraM stIrNaM rAye subharaM vedyasyAm
ghRtenAktaM vasavaH sIdatedaM vishve devA AdityA yajñiyAsaH
vi shrayantAmurviyA hUyamAnA dvAro devIH suprAyaNA namobhiH
vyacasvatIrvi prathantAmajuryA varNaM punAnAyashasaM suvIram
sAdhvapAMsi sanatA na ukSite uSAsAnaktA vayyeva raNvite
tantuM tataM saMvayantI samIcI yajñasya peshaH sudughe payasvatI
daivyA hotArA prathamA viduSTara Rju yakSataH saM RcAvapuSTarA
devAn yajantAv RtuthA samañjato nAbhA pRthivyA adhi sAnuSu triSu
sarasvatI sAdhayantI dhiyaM na iLA devI bhAratI vishvatUrtiH
tisro devIH svadhayA barhiredamachidraM pAntusharaNaM niSadya
pishaN^garUpaH subharo vayodhAH shruSTI vIro jAyate devakAmaH
prajAM tvaSTA vi Syatu nAbhimasme athA devAnAmapyetu pAthaH
vanaspatiravasRjannupa sthAdagnirhaviH sUdayAti pra dhIbhiH
tridhA samaktaM nayatu prajAnan devebhyo daivyaH shamitopa havyam
ghRtaM mimikSe ghRtamasya yonirghRte shrito ghRtaM vasya dhAma
anuSvadhamA vaha mAdayasva svAhAkRtaM vRSabha vakSi havyam