HYMN 4

samit\-samit sumanA bodhyasme shucA\-shucA sumatiM rAsi vasvaH
A deva devAn yajathAya vakSi sakhA sakhIn sumanA yakSyagne
yaM devAsastrirahannAyajante dive\-dive varuNo mitro agniH
semaM yajñaM madhumantaM kRdhI nastanUnapAd ghRtayoniM vidhantam
pra dIdhitirvishvavArA jigAti hotAramiLaH prathamaM yajadhyai
achA namobhirvRSabhaM vandadhyai sa devAn yakSadiSito yajIyAn
Urdhvo vAM gAturadhvare akAryUrdhvA shocIMSi prasthitA rajAMsi
divo vA nAbhA nyasAdi hotA stRNImahi devavyacA vi barhiH
sapta hotrANi manasA vRNAnA invanto vishvaM prati yannRtena
nRpeshaso vidatheSu pra jAtA abhImaM yajñaM vi caranta pUrvIH
A bhandamAne uSasA upAke uta smayete tanvA virUpe
yathA no mitro varuNo jujoSadindro marutvAnuta vA mahobhiH
daivyA hotArA prathamA ny Rñje sapta pRkSAsaH svadhayAmadanti
RtaM shaMsanta Rtamit ta Ahuranu vrataM vratapA dIdhyAnAH
A bhAratI bhAratIbhiH sajoSA iLA devairmanuSyebhiragniH
sarasvatI sArasvatebhirarvAk tisro devIrbarhiredaM sadantu
tan nasturIpamadha poSayitnu deva tvaSTarvi rarANaH syasva
yato vIraH karmaNyaH sudakSo yuktagrAvA jAyate devakAmaH
vanaspate.ava sRjopa devAnagnirhaviH shamitA sUdayAti
sedu hotA satyataro yajAti yathA devAnAM janimAni veda
A yAhyagne samidhAno arvAM indreNa devaiH sarathaM turebhiH
barhirna AstAmaditiH suputrA svAhA devA amRtAmAdayantAm