HYMN 4

kRNuSva pAjaH prasitiM na pRthvIM yAhi rAjevAmavAM ibhena |
tRSvIm anu prasitiM drUNAno 'stAsi vidhya rakSasas tapiSThaiH ||
tava bhramAsa AshuyA patanty anu spRsha dhRSatA shoshucAnaH |
tapUMSy agne juhvA pataMgAn asaMdito vi sRja viSvag ulkAH ||
prati spasho vi sRja tUrNitamo bhavA pAyur visho asyA adabdhaH |
yo no dUre aghashaMso yo anty agne mAkiS Te vyathir A dadharSIt ||
ud agne tiSTha praty A tanuSva ny amitrAM oSatAt tigmahete |
yo no arAtiM samidhAna cakre nIcA taM dhakSy atasaM na shuSkam ||
Urdhvo bhava prati vidhyAdhy asmad AviS kRNuSva daivyAny agne |
ava sthirA tanuhi yAtujUnAM jAmim ajAmim pra mRNIhi shatrUn ||
sa te jAnAti sumatiM yaviSTha ya Ivate brahmaNe gAtum airat |
vishvAny asmai sudinAni rAyo dyumnAny aryo vi duro abhi dyaut ||
sed agne astu subhagaH sudAnur yas tvA nityena haviSA ya ukthaiH |
piprISati sva AyuSi duroNe vishved asmai sudinA sAsad iSTiH ||
arcAmi te sumatiM ghoSy arvAk saM te vAvAtA jaratAm iyaM gIH |
svashvAs tvA surathA marjayemAsme kSatrANi dhArayer anu dyUn ||
iha tvA bhUry A cared upa tman doSAvastar dIdivAMsam anu dyUn |
krILantas tvA sumanasaH sapemAbhi dyumnA tasthivAMso janAnAm ||
yas tvA svashvaH suhiraNyo agna upayAti vasumatA rathena |
tasya trAtA bhavasi tasya sakhA yas ta Atithyam AnuSag jujoSat ||
maho rujAmi bandhutA vacobhis tan mA pitur gotamAd anv iyAya |
tvaM no asya vacasash cikiddhi hotar yaviSTha sukrato damUnAH ||
asvapnajas taraNayaH sushevA atandrAso 'vRkA ashramiSThAH |
te pAyavaH sadhryañco niSadyAgne tava naH pAntv amUra ||
ye pAyavo mAmateyaM te agne pashyanto andhaM duritAd arakSan |
rarakSa tAn sukRto vishvavedA dipsanta id ripavo nAha debhuH ||
tvayA vayaM sadhanyas tvotAs tava praNIty ashyAma vAjAn |
ubhA shaMsA sUdaya satyatAte 'nuSThuyA kRNuhy ahrayANa ||
ayA te agne samidhA vidhema prati stomaM shasyamAnaM gRbhAya |
dahAshaso rakSasaH pAhy asmAn druho nido mitramaho avadyAt ||