HYMN 42

mama dvitA rASTraM kSatriyasya vishvAyor vishve amRtA yathA naH |
kratuM sacante varuNasya devA rAjAmi kRSTer upamasya vavreH ||
ahaM rAjA varuNo mahyaM tAny asuryANi prathamA dhArayanta |
kratuM sacante varuNasya devA rAjAmi kRSTer upamasya vavreH ||
aham indro varuNas te mahitvorvI gabhIre rajasI sumeke |
tvaSTeva vishvA bhuvanAni vidvAn sam airayaM rodasI dhArayaM ca ||
aham apo apinvam ukSamANA dhArayaM divaM sadana Rtasya |
Rtena putro aditer RtAvota tridhAtu prathayad vi bhUma ||
mAM naraH svashvA vAjayanto mAM vRtAH samaraNe havante |
kRNomy Ajim maghavAham indra iyarmi reNum abhibhUtyojAH ||
ahaM tA vishvA cakaraM nakir mA daivyaM saho varate apratItam |
yan mA somAso mamadan yad ukthobhe bhayete rajasI apAre ||
viduS te vishvA bhuvanAni tasya tA pra bravISi varuNAya vedhaH |
tvaM vRtrANi shRNviSe jaghanvAn tvaM vRtAM ariNA indra sindhUn ||
asmAkam atra pitaras ta Asan sapta RSayo daurgahe badhyamAne |
ta Ayajanta trasadasyum asyA indraM na vRtraturam ardhadevam ||
purukutsAnI hi vAm adAshad dhavyebhir indrAvaruNA namobhiH |
athA rAjAnaM trasadasyum asyA vRtrahaNaM dadathur ardhadevam ||
rAyA vayaM sasavAMso madema havyena devA yavasena gAvaH |
tAM dhenum indrAvaruNA yuvaM no vishvAhA dhattam anapasphurantIm ||