HYMN 51

idam u tyat purutamam purastAj jyotis tamaso vayunAvad asthAt |
nUnaM divo duhitaro vibhAtIr gAtuM kRNavann uSaso janAya ||
asthur u citrA uSasaH purastAn mitA iva svaravo 'dhvareSu |
vy U vrajasya tamaso dvArochantIr avrañ chucayaH pAvakAH ||
uchantIr adya citayanta bhojAn rAdhodeyAyoSaso maghonIH |
acitre antaH paNayaH sasantv abudhyamAnAs tamaso vimadhye ||
kuvit sa devIH sanayo navo vA yAmo babhUyAd uSaso vo adya |
yenA navagve aN^gire dashagve saptAsye revatI revad USa ||
yUyaM hi devIr Rtayugbhir ashvaiH pariprayAtha bhuvanAni sadyaH |
prabodhayantIr uSasaH sasantaM dvipAc catuSpAc carathAya jIvam ||
kva svid AsAM katamA purANI yayA vidhAnA vidadhur RbhUNAm |
shubhaM yac chubhrA uSasash caranti na vi jñAyante sadRshIr ajuryAH ||
tA ghA tA bhadrA uSasaH purAsur abhiSTidyumnA RtajAtasatyAH |
yAsv IjAnaH shashamAna ukthai stuvañ chaMsan draviNaM sadya Apa ||
tA A caranti samanA purastAt samAnataH samanA paprathAnAH |
Rtasya devIH sadaso budhAnA gavAM na sargA uSaso jarante ||
tA in nv eva samanA samAnIr amItavarNA uSasash caranti |
gUhantIr abhvam asitaM rushadbhiH shukrAs tanUbhiH shucayo rucAnAH ||
rayiM divo duhitaro vibhAtIH prajAvantaM yachatAsmAsu devIH |
syonAd A vaH pratibudhyamAnAH suvIryasya patayaH syAma ||
tad vo divo duhitaro vibhAtIr upa bruva uSaso yajñaketuH |
vayaM syAma yashaso janeSu tad dyaush ca dhattAm pRthivI ca devI ||