HYMN 74

kUSTho devAv ashvinAdyA divo manAvasU |
tac chravatho vRSaNvasU atrir vAm A vivAsati ||
kuha tyA kuha nu shrutA divi devA nAsatyA |
kasminn A yatatho jane ko vAM nadInAM sacA ||
kaM yAthaH kaM ha gachathaH kam achA yuñjAthe ratham |
kasya brahmANi raNyatho vayaM vAm ushmasISTaye ||
pauraM cid dhy udaprutam paura paurAya jinvathaH |
yad IM gRbhItatAtaye siMham iva druhas pade ||
pra cyavAnAj jujuruSo vavrim atkaM na muñcathaH |
yuvA yadI kRthaH punar A kAmam RNve vadhvaH ||
asti hi vAm iha stotA smasi vAM saMdRshi shriye |
nU shrutam ma A gatam avobhir vAjinIvasU ||
ko vAm adya purUNAm A vavne martyAnAm |
ko vipro vipravAhasA ko yajñair vAjinIvasU ||
A vAM ratho rathAnAM yeSTho yAtv ashvinA |
purU cid asmayus tira AN^gUSo martyeSv A ||
sham U Su vAm madhUyuvAsmAkam astu carkRtiH |
arvAcInA vicetasA vibhiH shyeneva dIyatam ||
ashvinA yad dha karhi cic chushrUyAtam imaM havam |
vasvIr U Su vAm bhujaH pRñcanti su vAm pRcaH ||