HYMN 80

dyutadyAmAnam bRhatIm Rtena RtAvarIm aruNapsuM vibhAtIm |
devIm uSasaM svar AvahantIm prati viprAso matibhir jarante ||
eSA janaM darshatA bodhayantI sugAn pathaH kRNvatI yAty agre |
bRhadrathA bRhatI vishvaminvoSA jyotir yachaty agre ahnAm ||
eSA gobhir aruNebhir yujAnAsredhantI rayim aprAyu cakre |
patho radantI suvitAya devI puruSTutA vishvavArA vi bhAti ||
eSA vyenI bhavati dvibarhA AviSkRNvAnA tanvam purastAt |
Rtasya panthAm anv eti sAdhu prajAnatIva na disho minAti ||
eSA shubhrA na tanvo vidAnordhveva snAtI dRshaye no asthAt |
apa dveSo bAdhamAnA tamAMsy uSA divo duhitA jyotiSAgAt ||
eSA pratIcI duhitA divo nR^In yoSeva bhadrA ni riNIte apsaH |
vyUrNvatI dAshuSe vAryANi punar jyotir yuvatiH pUrvathAkaH ||