HYMN 2

tvaM hi kSaitavad yasho.agne mitro na patyase
tvaM vicarSaNe shravo vaso puSTiM na puSyasi
tvAM hi SmA carSaNayo yajñebhirgIrbhirILate
tvAM vAjI yAtyavRko rajastUrvishvacarSaNiH
sajoSastvA divo naro yajñasya ketumindhate
yad dha sya mAnuSo janaH sumnAyurjuhve adhvare
Rdhad yaste sudAnave dhiyA martaH shashamate
UtI Sa bRhato divo dviSo aMho na tarati
samidhA yasta AhutiM nishitiM martyo nashat
vayAvantaMsa puSyati kSayamagne shatAyuSam
tveSaste dhUma RNvati divi Sañchukra AtataH
sUro na hi dyutA tvaM kRpA pAvaka rocase
adhA hi vikSvIDyo.asi priyo no atithiH
raNvaH purIva jUryaH sUnurna trayayAyyaH
kratvA hi droNe ajyase.agne vAjI na kRtvyaH
parijmevasvadhA gayo.atyo na hvAryaH shishuH
tvaM tyA cidacyutAgne pashurna yavase
dhAmA ha yat te ajara vanA vRshcanti shikvasaH
veSi hyadhvarIyatAmagne hotA dame vishAm
samRdho vishpate kRNu juSasva havyamaN^giraH
achA no mitramaho deva devAnagne vocaH sumatiM rodasyoH
vIhi svastiM sukSitiM divo nR^In dviSo aMhAMsi duritAtarema tA tarema tavAvasA tarema