HYMN 51

tvAmid dhi havAmahe sAtA vAjasya kAravaH
tvAM vRtreSvindra satpatiM narastvAM kASThAsvarvataH
sa tvaM nashcitra vajrahasta dhRSNuyA maha stavAno adrivaH
gAmashvaM rathyamindra saM kira satrA vAjaM na jigyuSe
yaH satrAhA vicarSaNirindraM taM hUmahe vayam
sahasramuSka tuvinRmNa satpate bhavA samatsu no vRdhe
bAdhase janAn vRSabheva manyunA ghRSau mILha RcISama
asmAkaM bodhyavitA mahAdhane tanUSvapsu sUrye
indra jyeSThaM na A bharanojiSThaM papuri shravaH
yeneme citra vajrahasta rodasI obhe sushipra prAH
tvAmugramavase carSaNIsahaM rAjan deveSu hUmahe
vishvA su no vithurA pibdanA vaso.amitrAn suSahAn kRdhi
yadindra nAhuSISvAnojo nRmNaM ca kRSTiSu
yad vApañca kSitInAM dyumnamA bhara satrA vishvAni pauMsyA
yad vA tRkSau maghavan druhyAvA jane yat pUrau kacca vRSNyam
asmabhyaM tad rirIhi saM nRSAhye.amitrAn pRtsuturvaNe
indra tridhAtu sharaNaM trivarUthaM svastimat
chardiryacha maghavadbhyashca mahyaM ca yAvayA didyumebhyaH
ye gavyatA manasA shatrumAdabhurabhipraghnanti dhRSNuyA
adha smA no maghavannindra girvaNastanUpA antamo bhava
adha smA no vRdhe bhavendra nAyamavA yudhi
yadantarikSepatayanti parNino didyavastigmamUrdhAnaH
yatra shUrAsastanvo vitanvate priyA sharma pitR^INAm
adha smA yacha tanve tane ca chardiracittaM yAvaya dveSaH
yadindra sarge arvatashcodayAse mahAdhane
asamane adhvanivRjine pathi shyenAniva shravasyatah
sindhUnriva pravaNa AshuyA yato yadi kloshamanu SvaNi
A ye vayo na varvRtatyAmiSi gRbhItA bAhvorgavi