HYMN 5

dUrAdiheva yat satyaruNapsurashishvitat
vi bhAnuM vishvadhAtanat
nRvad dasrA manoyujA rathena pRthupAjasA
sacethe ashvinoSasam
yuvAbhyAM vAjinIvasU prati stoma adRkSata
vAcaM dUtoyathohiSe
purupriyA Na Utaye purumandrA purUvasU
stuSe kaNvAsoashvinA
maMhiSThA vAjasAtameSayantA shubhas patI
gantArA dAshuSo gRham
tA sudevAya dAshuSe sumedhAmavitAriNIm
ghRtairgavyUtimukSatam
A na stomamupa dravat tUyaM shyenebhirAshubhiH
yAtamashvebhirashvinA
yebhistisraH parAvato divo vishvAni rocanA
trInraktUn paridIyathaH
uta no gomatIriSa uta sAtIraharvidA
vi pathaH sAtaye sitam
A no gomantamashvinA suvIraM surathaM rayim
voLhamashvAvatIriSaH
vAvRdhAnA shubhas patI dasrA hiraNyavartanI
pibataM somyaM madhu
asmabhyaM vAjinIvasU maghavadbhyashca saprathaH
chardiryantamadAbhyam
ni Su brahma janAnAM yAviSTaM tUyamA gatam
mo SvanyAnupAratam
asya pibatamashvinA yuvaM madasya cAruNaH
madhvo rAtasyadhiSNyA
asme A vahataM rayiM shatavantaM sahasriNam
purukSuM vishvadhAyasam
purutrA cid dhi vAM narA vihvayante manISiNaH
vAghadbhirashvinA gatam
janAso vRktabarhiSo haviSmanto araMkRtaH
yuvAM havante ashvinA
asmAkamadya vAmayaM stomo vAhiSTho antamaH
yuvAbhyAM bhUtvashvinA
yo ha vAM madhuno dRtirAhito rathacarSaNe
tataH pibatamashvinA
tena no vAjinIvasU pashve tokAya shaM gave
vahataM pIvarIriSaH
uta no divyA iSa uta sindhUnraharvidA
apa dvAreva varSathaH
kadA vAM taugryo vidhat samudre jahito narA
yad vAM ratho vibhiS patAt
yuvaM kaNvAya nAsatyApiriptAya harmye
shashvadUtIrdashasyathaH
tAbhirA yAtamUtibhirnavyasIbhiH sushastibhiH
yad vAM vRSaNvasU huve
yathA cit kaNvamAvataM priyamedhamupastutam
atriM shiñjAramashvinA
yathota kRtvye dhane.aMshuM goSvagastyam
yathA vAjeSu sobharim
etAvad vAM vRSaNvasU ato vA bhUyo ashvinA
gRNantaH sumnamImahe
rathaM hiraNyavandhuraM hiraNyAbhIshumashvinA
A hi sthAtho divispRsham
hiraNyayI vAM rabhirISA akSo hiraNyayaH
ubhA cakrA hiraNyayA
tena no vAjinIvasU parAvatashcidA gatam
upemAM suSTutiM mama
A vahethe parAkAt pUrvIrashnantAvashvinA
iSo dAsIramartyA
A no dyumnairA shravobhirA rAyA yAtamashvinA
purushcandrA nAsatyA
eha vAM pruSitapsavo vayo vahantu parNinaH
achA svadhvaraM janam
rathaM vAmanugAyasaM ya iSA vartate saha
na cakramabhi bAdhate
hiraNyayena rathena dravatpANibhirashvaiH
dhIjavanA nAsatyA
yuvaM mRgaM jAgRvAMsaM svadatho vA vRSaNvasU
tA naHpRN^ktamiSA rayim
tA me ashvinA sanInAM vidyAtaM navAnAm
yathA ciccaidyaH kashuH shatamuSTrAnAM dadat sahasrA dasha gonAm
yo me hiraNyasandRsho dasha rAjño amaMhata
adhaspadA iccaidyasya kRSTayashcarmamnA abhito janAH
mAkirenA pathA gAd yeneme yanti cedayaH
anyo net sUrirohate bhUridAvattaro janaH