HYMN 7

pra yad vastriSTubhamiSaM maruto vipro akSarat
vi parvateSu rAjatha
yadaN^ga taviSIyavo yAmaM shubhrA acidhvam
ni parvatA ahAsata
udIrayanta vAyubhirvAshrAsaH pRshnimAtaraH
dhukSantapipyushImiSam
vapanti maruto mihaM pra vepayanti parvatAn
yad yAmaM yAnti vAyubhiH
ni yad yAmAya vo girirni sindhavo vidharmaNe
mahe shuSmAya yemire
yuSmAnu naktamUtaye yuSmAn divA havAmahe
yuSmAn prayatyadhvare
udu tye aruNapsavashcitrA yAmebhirIrate
vAshrA adhiSNunA divaH
sRjanti rashmimojasA panthAM sUryAya yAtave
te bhAnubhirvi tasthire
imAM me maruto giramimaM stomaM RbhukSaNaH
imaM me vanatA havam
trINi sarAMsi pRshnayo duduhre vajriNe madhu
utsaM kavandhamudriNam
maruto yad dha vo divaH sumnAyanto havAmahe
A tU na upagantana
yUyaM hi SThA sudAnavo rudrA RbhukSaNo dame
uta pracetaso made
A no rayiM madacyutaM purukSuM vishvadhAyasam
iyartA maruto divaH
adhIva yad girINAM yAmaM shubhrA acidhvam
suvAnairmandadhva indubhiH
etAvatashcideSAM sumnaM bhikSeta martyaH
adAbhyasya manmabhiH
ye drapsA iva rodasI dhamantyanu vRSTibhiH
utsaM duhanto akSitam
udu svAnebhirIrata ud rathairudu vAyubhiH
ut stomaiH pRshnimAtaraH
yenAva turvashaM yaduM yena kaNvaM dhanaspRtam
rAye su tasya dhImahi
imA u vaH sudAnavo ghRtaM na pipyuSIriSaH
vardhAn kANvasya manmabhiH
kva nUnaM sudAnavo madathA vRktabarhiSaH
brahmA ko vaHsaparyati
nahi Sma yad dha vaH purA stomebhirvRktabarhiSaH
shardhAn Rtasya jinvatha
samu tye mahatIrapaH saM kSoNI samu sUryam
saM vajraM parvasho dadhuH
vi vRtraM parvasho yayurvi parvatAnarAjinaH
cakrANA vRSNi pauMsyam
anu tritasya yudhyataH shuSmamAvannuta kratum
anvindraM vRtratUrye
vidyuddhastA abhidyavaH shiprAH shIrSan hiraNyayIH
shubhrA vyañjata shriye
ushanA yat parAvata ukSNo randhramayAtana
dyaurna cakradad bhiyA
A no makhasya dAvane.ashvairhiraNyapANibhiH
devAsa upa gantana
yadeSAM pRSatI rathe praSTirvahati rohitaH
yAnti shubhrA riNannapaH
suSome sharyaNAvatyArjIke pastyAvati
yayurnicakrayA naraH
kadA gachAtha maruta itthA vipraM havamAnam
mArDIkebhirnAdhamAnam
kad dha nUnaM kadhapriyo yadindramajahAtana
ko vaH sakhitva ohate
saho Su No vajrahastaiH kaNvAso agniM marudbhiH
stuSehiraNyavAshIbhiH
o Su vRSNaH prayajyUnA navyase suvitAya
vavRtyAM citravAjAn
girayashcin ni jihate parshAnAso manyamAnAH
parvatAshcin ni yemire
AkSNayAvAno vahantyantarikSeNa patataH
dhAtAraH stuvate vayaH
agnirhi jAni pUrvyashchando na sUro arciSA
te bhAnubhirvi tasthire