HYMN 22

o tyamahva A rathamadyA daMsiSThamUtaye
yamashvinA suhavA rudravartanI A sUryAyai tasthathuH
pUrvAyuSaM suhavaM puruspRhaM bhujyuM vAjeSu pUrvyam
sacanAvantaM sumatibhiH sobhare vidveSasamanehasam
iha tyA purubhUtamA devA namobhirashvinA
arvAcInA svavase karAmahe gantArA dashuSo gRham
yuvo rathasya pari cakramIyata IrmAnyad vAmiSaNyati
asmAnachA sumatirvAM shubhas patI A dhenuriva dhAvatu
ratho yo vAM trivandhuro hiraNyabhIshurashvinA
pari dyAvApRthivI bhUSati shrutastena nAsatyA gatam
dashasyantA manave pUrvyaM divi yavaM vRkeNa karSathaH
tA vAmadya sumatibhiH shubhas patI ashvinA pra stuvImahi
upa no vajinIvasU yAtaM Rtasya pathibhiH
yebhistRkSiM vRSaNA trasadasyavaM mahe kSatrAya jinvathaH
ayaM vAmadribhiH sutaH somo nara vRSaNvasu
A yAtaM somapItaye pibataM dAshuSo gRhe
A hi ruhatamashvinA rathe koshe hiraNyaye vRSaNvasU
yuñjAthAM pIvarIriSaH
yAbhiH pakthamavatho yAbhiradhriguM yAbhirbabhruM vijoSasam
tAbhirno makSU tUyamashvinA gataM bhiSajyataMyadAturam
yadadhrigAvo adhrigU idA cidahno ashvinA havAmahe
vayaM gIrbhirvipanyavaH
tAbhirA yAtaM vRSaNopa me havaM vishvapsuM vishvavAryam
iSA maMhiSThA purubhUtamA narA yAbhiH kriviM vavRdhustAbhirA gatam
tAvidA cidahAnAM tAvashvinA vandamAna upa bruve
tA u namobhirImahe
tAvid doSA tA uSasi shubhas patI tA yAman rudravartanI
mA no martAya ripave vAjinIvasU paro rudrAvati khyatam
A sugmyAya sugmyaM prAtA rathenAshvinA vA sakSaNI
huve piteva sobharI
manojavasA vRSaNA madacyutA makSuMgamAbhirutibhiH
ArAttAccid bhUtamasme avase purvIbhiH purubhojasA
A no ashvAvadashvinA vartiryAsiSTaM madhupAtamA narA
gomad dasrA hiraNyavat
suprAvargaM suvIryaM suSThu vAryamanAdhRSTaM rakSasvinA
asminnA vAmAyAne vAjinIvasU vishvA vAmAni dhImahi