HYMN 48

svAdorabhakSi vayasaH sumedhAH svAdhyo varivovittarasya
vishve yaM devA uta martyAso madhu bruvanto abhi saMcaranti
antashca prAgA aditirbhavAsyavayAtA haraso daivyasya
indavindrasya sakhyaM juSANaH shrauSTIva dhuramanu rAya RdhyAH
apAma somamamRtA abhUmAganma jyotiravidAma devAn
kiM nUnamasmAn kRNavadarAtiH kimu dhUrtiramRta martyasya
shaM no bhava hRda A pIta indo piteva soma sUnave sushevaH
sakheva sakhya urushaMsa dhIraH pra Na AyurjIvase somatArIH
ime mA pItA yashasa uruSyavo rathaM na gAvaH samanAhaparvasu
te mA rakSantu visrasashcaritrAduta mA srAmAdyavayantvindavaH
agniM na mA mathitaM saM didIpaH pra cakSaya kRNuhi vasyaso naH
athA hi te mada A soma manye revAniva pra carApuSTimacha
iSireNa te manasA sutasya bhakSImahi pitryasyeva rAyaH
soma rAjan pra Na AyUMSi tArIrahAnIva sUryo vAsarANi
soma rAjan mRLayA naH svasti tava smasi vratyAstasya viddhi
alarti dakSa uta manyurindo mA no aryo anukAmaM parAdAH
tvaM hi nastanvaH soma gopA gAtre\-gAtre niSasatthA nRcakSAH
yat te vayaM praminAma vratAni sa no mRLa suSakhAdeva vasyaH
RdUdareNa sAkhyA saceya yo mA na riSyed dharyashva pItaH
ayaM yaH somo nyadhAyyasme tasmA indraM pratiramemyAyuH
apa tyA asthuranirA amIvA niratrasan tamiSIcIrabhaiSuH
A somo asmAnaruhad vihAyA aganma yatra pratiranta AyuH
yo na induH pitaro hRtsu pIto.amartyo martyAnAvivesha
tasmai somAya haviSA vidhema mRLIke asya sumatau syAma
tvaM soma pitRbhiH saMvidAno.anu dyAvApRthivI A tatantha
tasmai ta indo haviSA vidhema vayaM syAma patayo rayINAm
trAtAro devA adhi vocatA no mA no nidrA Ishata mota jalpiH
vayaM somasya vishvaha priyAsaH suvIrAso vidathamAvadema
tvaM naH soma vishvato vayodhAstvaM svarvidA vishA nRcakSAH
tvaM na inda UtibhiH sajoSAH pAhi pashcAtAduta vA purastAt