HYMN 60

agna A yAhyagnibhirhotAraM tvA vRNImahe
A tvAmanaktu prayatA haviSmatI yajiSThaM barhirAsade
achA hi tvA sahasaH sUno aN^giraH srucashcarantyadhvare
Urjo napAtaM ghRtakeshamImahe.agniM yajñeSu pUrvyam
agne kavirvedhA asi hotA pAvaka yakSyaH
mandro yajiSTho adhvareSvIDyo viprebhiH shukra manmabiH
adroghamA vahoshato yaviSThya devAnajasra vItaye
abhi prayAMsi sudhitA vaso gahi mandasva dhItibhirhitaH
tvamit saprathA asyagne trAtar{R}tas kaviH
tvAM viprAsaH samidhAna dIdiva A vivAsanti vedhasaH
shocA shociSTha dIdihi vishe mayo rAsva stotre mahAnasi
devAnAM sharman mama santu sUrayaH shatrUSAhaH svagnayaH
yathA cid vRddhamatasamagne saMjUrvasi kSami
evA dahamitramaho yo asmadhrug durmanmA kashca venati
mA no martAya ripave rakSasvine mAghashaMsAya rIradhaH
asredhadbhistaraNibhiryaviSThya shivebhiH pAhi pAyubhiH
pAhi no agna ekayA pAhyuta dvitIyayA
pAhi gIrbhistisRbhirUrjAM pate pAhi catasRbhirvaso
pAhi vishvasmAd rakSaso arAvNaH pra sma vAjeSu no.ava
tvAmid dhi nediSThaM devatAtaya ApiM nakSAmahe vRdhe
A no agne vayovRdhaM rayiM pAvaka shaMsyam
rAsvA ca na upamAte puruspRhaM sunItI svayashastaram
yena vaMsAma pRtanAsu shardhatastaranto arya AdishaH
sa tvaM no vardha prayasA shacIvaso jinvA dhiyo vasuvidaH
shishAno vRSabho yathAgniH shRN^ge davidhvat
tigmA asya nanavo na pratidhRSe sujambhaH sahaso yahuH
nahi te agne vRSabha pratidhRSe jambhAso yad vitiSTase
satvaM no hotaH suhutaM haviS kRdhi vaMsvA no vAryA puru
sheSe vaneSu mAtroH saM tvA martAsa indhate
atandro havyA vahasi haviSkRta Adid deveSu rAjasi
sapta hotArastamidILate tvAgne sutyajamahrayam
bhinatsyadriM tapasA vi shociSA prAgne tiSTha janAnati
agnim\-agniM vo adhriguM huvema vRktabarhiSaH
agniM hitaprayasaH shashvatISvA hotAraM carSaNInAm
ketena sharman sacate suSAmaNyagne tubhyaM cikitvanA
iSaNyayA naH pururUpamA bhara vAjaM nediSThamUtaye
agne jaritarvishpatistepAno deva rakSasaH
aproSivAn gRhapatirmahAnasi divas pAyurduroNayuH
mA no rakSa A veshIdAghRNIvaso mA yAturyAtumAvatAm
parogavyUtyanirAmapa kSudhamagne sedha rakSasvinaH