HYMN 70

yo rAjA carSaNInAM yAtA rathebhir adhriguH |
vishvAsAM tarutA pRtanAnAM jyeSTho yo vRtrahA gRNe ||
indraM taM shumbha puruhanmann avase yasya dvitA vidhartari |
hastAya vajraH prati dhAyi darshato maho dive na sUryaH ||
nakiS TaM karmaNA nashad yash cakAra sadAvRdham |
indraM na yajñair vishvagUrtam Rbhvasam adhRSTaM dhRSNvïjasam ||
aSALham ugram pRtanAsu sAsahiM yasmin mahIr urujrayaH |
saM dhenavo jAyamAne anonavur dyAvaH kSAmo anonavuH ||
yad dyAva indra te shataM shatam bhUmIr uta syuH |
na tvA vajrin sahasraM sUryA anu na jAtam aSTa rodasI ||
A paprAtha mahinA vRSNyA vRSan vishvA shaviSTha shavasA |
asmAM ava maghavan gomati vraje vajriñ citrAbhir UtibhiH ||
na sIm adeva Apad iSaM dIrghAyo martyaH |
etagvA cid ya etashA yuyojate harI indro yuyojate ||
taM vo maho mahAyyam indraM dAnAya sakSaNim |
yo gAdheSu ya AraNeSu havyo vAjeSv asti havyaH ||
ud U Su No vaso mahe mRshasva shUra rAdhase |
ud U Su mahyai maghavan maghattaya ud indra shravase mahe ||
tvaM na indra Rtayus tvAnido ni tRmpasi |
madhye vasiSva tuvinRmNorvor ni dAsaM shishnatho hathaiH ||
anyavratam amAnuSam ayajvAnam adevayum |
ava svaH sakhA dudhuvIta parvataH sughnAya dasyum parvataH ||
tvaM na indrAsAM haste shaviSTha dAvane |
dhAnAnAM na saM gRbhAyAsmayur dviH saM gRbhAyAsmayuH ||
sakhAyaH kratum ichata kathA rAdhAma sharasya |
upastutim bhojaH sUrir yo ahrayaH ||
bhUribhiH samaha RSibhir barhiSmadbhi staviSyase |
yad ittham ekam-ekam ic chara vatsAn parAdadaH ||
karNagRhyA maghavA shauradevyo vatsaM nas tribhya Anayat |
ajAM sUrir na dhAtave ||