HYMN 75

yukSvA hi devahUtamAnashvAnagne rathIriva
ni hotA pUrvyaH sadaH
uta no deva devAnachA voco viduSTaraH
shrad vishvA vAryA kRdhi
tvaM ha yad yaviSThya sahasaH sUnavAhuta
RtAvA yajñiyo bhuvaH
ayamagniH sahasriNo vAjasya shatinas patiH
mUrdhA kavI rayINAm
taM nemiM Rbhavo yathA namasva sahUtibhiH
nedIyo yajñamaN^giraH
tasmai nUnamabhidyave vAcA virUpa nityayA
vRSNe codasva suSTutim
kamu Svidasya senayAgnerapAkacakSasaH
paNiM goSu starAmahe
mA no devAnAM vishaH prasnAtIrivosrAH
kRshaM na hAsuraghnyAH
mA naH samasya dUDhyaH paridveSaso aMhatiH
Urmirna nAvamA vadhIt
namaste agna ojase gRNanti deva kRSTayaH
amairamitramardaya
kuvit su no gaviSTaye.agne saMveSiSo rayim
urukRduru Nas kRdhi
mA no asmin mahAdhane parA varg bhArabhRd yathA
saMvargaM saM rayiM jaya
anyamasmad bhiyA iyamagne siSaktu duchunA
vardhA no amavacchavaH
yasyAjuSan namasvinaH shamImadurmakhasya vA
taM ghedagnirvRdhAvati
parasyA adhi saMvato.avarAnabhyA tara
yatrAhamasmi tAnava
vidmA hi te purA vayamagne pituryathAvasaH
adhA te sumnamImahe