HYMN 93

ud ghedabhi shrutAmaghaM vRSabhaM naryApasam
astArameSi sUrya
nava yo navatiM puro bibheda bAhvojasA
ahiM ca vRtrahAvadhIt
sa na indraH shivaH sakhAshvAvad gomad yavamat
urudhAreva dohate
yadadya kacca vRtrahannudagA abhi sUrya
sarvaM tadindra te vashe
yad vA pravRddha satpate na marA iti manyase
uto tat satyamit tava
ye somAsaH parAvati ye arvAvati sunvire
sarvAMstAnindra gachasi
tamindraM vAjayAmasi mahe vRtrAya hantave
sa vRSA vRSabho bhuvat
indraH sa dAmane kRta ojiSThaH sa made hitaH
dyumnIshlokI sa somyaH
girA vajro na sambhRtaH sabalo anapacyutaH
vavakSa RSvoastRtaH
durge cin naH sugaM kRdhi gRNAna indra girvaNaH
tvaM ca maghavan vashaH
yasya te nU cidAdishaM na minanti svarAjyam
na devo nAdhrigurjanaH
adhA te apratiSkutaM devI shuSmaM saparyataH
ubhe suSipra rodasI
tvametadadhArayaH kRSNAsu rohiNISu ca
paruSNISu rushat payaH
vi yadaheradha tviSo vishve devAso akramuH
vidan mRgasya tAnamaH
A u me nivaro bhuvad vRtrahAdiSTa pauMsyam
ajAtashatrurastRtaH
shrutaM vo vRtrahantamaM pra shardhaM carSaNInAm
A shuSe rAdhase mahe
ayA dhiyA ca gavyayA puruNAman puruSTuta
yat some\-somaAbhavaH
bodhinmanA idastu no vRtrahA bhUryAsutiH
shRNotu shakraAshiSam
kayA tvaM na UtyAbhi pra mandase vRSan
kayA stotRbhya A bhara
kasya vRSA sute sacA niyutvAn vRSabho raNat
vRtrahA somapItaye
abhI Su NastvaM rayiM mandasAnaH sahasriNam
prayantAbodhi dAshuSe
patnIvantaH sutA ima ushanto yanti vItaye
apAM jagmirnicumpuNaH
iSTA hotrA asRkSatendraM vRdhAso adhvare
achAvabhRthamojasA
iha tyA sadhamAdyA harI hiraNyakeshyA
voLhAmabhi prayo hitam
tubhyaM somAH sutA ime stIrNaM barhirvibhAvaso
stotRbhya indramA vaha
A te dakSaM vi rocanA dadhad ratnA vi dAshuSe
stotRbhya indramarcata
A te dadhAmIndriyamukthA vishvA shatakrato
stotRbhya indra mRLaya
bhadram\-bhadraM na A bhareSamUrjaM shatakrato
yadindra mRLayAsi naH
sa no vishvAnyA bhara suvitAni shatakrato
yadindra mRLayAsi naH
tvAmid vRtrahantama sutAvanto havAmahe
yadindra mRLayAsinaH
upa no haribhiH sutaM yAhi madAnAM pate
upa no haribhiHsutam
dvitA yo vRtrahantamo vida indraH shatakratuH
upa no haribhiH sutam
tvaM hi vRtrahanneSAM pAtA somAnAmasi
upa no haribhiH sutam
indra iSe dadAtu na RbhukSaNaM RbhuM rayim
vAjI dadAtuvAjinam