HYMN 3

eSa devo amartyaH parNavIriva dIyati
abhi droNAnyAsadam
eSa devo vipA kRto.ati hvarAMsi dhAvati
pavamAno adAbhyaH
eSa devo vipanyubhiH pavamAna RtAyubhiH
harirvAjAya mRjyate
eSa vishvAni vAryA shUro yanniva satvabhiH
pavamAnaHsiSAsati
eSa devo ratharyati pavamAno dashasyati
AviS kRNoti vagvanum
eSa viprairabhiSTuto.apo devo vi gAhate
dadhad ratnAnidAshuSe
eSa divaM vi dhAvati tiro rajAMsi dhArayA
pavamAnaHkanikradat
eSa divaM vyAsarat tiro rajANsyaspRtaH
pavamAnaH svadhvaraH
eSa pratnena janmanA devo devebhyaH sutaH
hariH pavitrearSati
eSa u sya puruvrato jajñAno janayanniSaH
dhArayA pavate sutaH