HYMN 34

trish cin no adyA bhavataM navedasA vibhur vAM yAma uta rAtir ashvinA |
yuvor hi yantraM himyeva vAsaso 'bhyAyaMsenyA bhavatam manISibhiH ||
trayaH pavayo madhuvAhane rathe somasya venAm anu vishva id viduH |
traya skambhAsa skabhitAsa Arabhe trir naktaM yAthas trir v ashvinA divA ||
samAne ahan trir avadyagohanA trir adya yajñam madhunA mimikSatam |
trir vAjavatIr iSo ashvinA yuvaM doSA asmabhyam uSasash ca pinvatam ||
trir vartir yAtaM trir anuvrate jane triH suprAvyetredheva shikSatam |
trir nAndyaM vahatam ashvinA yuvaM triH pRkSo asme akSareva pinvatam ||
trir no rayiM vahatam ashvinA yuvaM trir devatAtA trir utAvataM dhiyaH |
triH saubhagatvaM trir uta shravAMsi nas triSThaM vAM sUre duhitA ruhad ratham ||
trir no ashvinA divyAni bheSajA triH pArthivAni trir u dattam adbhyaH |
omAnaM shaMyor mamakAya sUnave tridhAtu sharma vahataM shubhas patI ||
trir no ashvinA yajatA dive-dive pari tridhAtu pRthivIm ashAyatam |
tisro nAsatyA rathyA parAvata Atmeva vAtaH svasarANi gachatam ||
trir ashvinA sindhubhiH saptamAtRbhis traya AhAvAs tredhA haviS kRtam |
tisraH pRthivIr upari pravA divo nAkaM rakSethe dyubhir aktubhir hitam ||
kva trI cakrA trivRto rathasya kva trayo vandhuro ye sanILAH |
kadA yogo vAjino rAsabhasya yena yajñaM nAsatyopayAthaH ||
A nAsatyA gachataM hUyate havir madhvaH pibatam madhupebhir AsabhiH |
yuvor hi pUrvaM savitoSaso ratham RtAya citraM ghRtavantam iSyati ||
A nAsatyA tribhir ekAdashair iha devebhir yAtam madhupeyam ashvinA |
prAyus tAriSTaM nI rapAMsi mRkSataM sedhataM dveSo bhavataM sacAbhuvA ||
A no ashvinA trivRtA rathenArvAñcaM rayiM vahataM suvIram |
shRNvantA vAm avase johavImi vRdhe ca no bhavataM vAjasAtau ||