HYMN 36
pra vo yahvaM purUNAM vishAM devayatInAm
agniM sUktebhirvacobhirImahe yaM sImidanya ILate
janAso agniM dadhire sahovRdhaM haviSmanto vidhema te
sa tvaM no adya sumanA ihAvitA bhavA vAjeSu santya
pra tvA dUtaM vRNImahe hotAraM vishvavedasam
mahaste sato vi carantyarcayo divi spRshanti bhAnavaH
devAsastvA varuNo mitro aryamA saM dUtaM pratnamindhate
vishvaM so agne jayati tvayA dhanaM yaste dadAsha martyaH
mandro hotA gRhapatiragne dUto vishAmasi
tve vishvA saMgatAni vratA dhruvA yAni devA akRNvata
tve idagne subhage yaviSThya vishvamA hUyate haviH
satvaM no adya sumanA utAparaM yakSi devAn suvIryA
taM ghemitthA namasvina upa svarAjamAsate
hotrAbhiragniM manuSaH samindhate titirvAMso ati sridhaH
ghnanto vRtramataran rodasI apa uru kSayAya cakrire
bhuvat kaNve vRSA dyumnyAhutaH krandadashvo gaviSTiSu
saM sIdasva mahAnasi shocasva devavItamaH
vi dhUmamagne aruSaM miyedhya sRja prashasta darshatam
yaM tvA devAso manave dadhuriha yajiSThaM havyavAhana
yaM kaNvo medhyAtithirdhanaspRtaM yaM vRSA yamupastutaH
yamagniM medhyAtithiH kaNva Idha RtAdadhi
tasya preSo dIdiyustamimA RcastamagniM vardhayAmasi
rAyas pUrdhi svadhAvo.asti hi te.agne deveSvApyam
tvaMvAjasya shrutyasya rAjasi sa no mRLa mahAnasi
Urdhva U Su Na Utaye tiSThA devo na savitA
UrdhvovAjasya sanitA yadañjibhirvAghadbhirvihvayAmahe
Urdhvo naH pAhyaMhaso ni ketunA vishvaM samatriNaM daha
kRdhI na UrdhvAñcarathAya jIvase vidA deveSu no duvaH
pAhi no agne rakSasaH pAhi dhUrterarAvNaH
pAhi rISata uta vA jighAMsato bRhadbhAno yaviSThya
ghaneva viSvag vi jahyarAvNastapurjambha yo asmadhruk
yo martyaH shishIte atyaktubhirmA naH sa ripurIshata
agnirvavne suvIryamagniH kaNvAya saubhagam
agniH prAvan mitrota medhyAtithimagniH sAtA upastutam
agninA turvashaM yaduM parAvata ugrAdevaM havAmahe
agnirnayan navavAstvaM bRhadrathaM turvItiM dasyave sahaH
ni tvAmagne manurdadhe jyotirjanAya shashvate
dIdetha kaNva RtajAta ukSito yaM namasyanti kRSTayaH
tveSAso agneramavanto arcayo bhImAso na pratItaye
rakSasvinaH sadamid yAtumAvato vishvaM samatriNaM daha
|