HYMN 37
krILaM vaH shardho mArutamanarvANaM ratheshubham
kaNvA abhi pra gAyata
ye pRSatIbhirRSTibhiH sAkaM vAshIbhirañjibhiH
ajAyanta svabhAnavaH
iheva shRNva eSAM kashA hasteSu yad vadAn
ni yAmañcitraM Rñjate
pra vaH shardhAya ghRSvaye tveSadyumnAya shuSmiNe
devattaM brahma gAyata
pra shaMsA goSvaghnyaM krILaM yacchardho mArutam
jambhe rasasya vAvRdhe
ko vo varSiSTha A naro divashca gmashca dhUtayaH
yat sIm antaM na dhUnutha ||
ni vo yAmAya mAnuSo dadhra ugrAya manyave |
jihIta parvato giriH ||
yeSAm ajmeSu pRthivI jujurvAM iva vishpatiH |
bhiyA yAmeSu rejate ||
sthiraM hi jAnam eSAM vayo mAtur niretave |
yat sIm anu dvitA shavaH ||
ud u tye sUnavo giraH kASThA ajmeSv atnata |
vAshrA abhijñu yAtave ||
tyaM cid ghA dIrgham pRthum miho napAtam amRdhram |
pra cyAvayanti yAmabhiH ||
maruto yad dha vo balaM janAM acucyavItana |
girIMr acucyavItana ||
yad dha yAnti marutaH saM ha bruvate 'dhvann A |
shRNoti kash cid eSAm ||
pra yAta shIbham AshubhiH santi kaNveSu vo duvaH |
tatro Su mAdayAdhvai ||
asti hi SmA madAya vaH smasi SmA vayam eSAm |
vishvaM cid Ayur jIvase ||
|