HYMN 47

ayaM vAM madhumattamaH sutaH soma RtAvRdhA
tamashvinA pibataM tiroahnyaM dhattaM ratnAni dAshushe
trivandhureNa trivRtA supeshasA rathenA yAtamashvinA
kaNvAso vAM brahma kRNvantyadhvare teSAM su shRNutaM havam
ashvinA madhumattamaM pAtaM somaM RtAvRdhA
athAdya dasrA vasu bibhratA rathe dAshvAMsamupa gachatam
triSadhasthe barhiSi vishvavedasA madhvA yajñaM mimikSatam
kaNvAso vAM sutasomA abhidyavo yuvAM havante ashvinA
yAbhiH kaNvamabhiSTibhiH prAvataM yuvamashvinA
tAbhiH SvasmAnavataM shubhas patI pAtaM somaM RtAvRdhA
sudAse dasrA vasu bibhratA rathe pRkSo vahatamashvinA
rayiM samudrAduta vA divas paryasme dhattaM puruspRham
yan nAsatyA parAvati yad vA stho adhi turvashe
ato rathena suvRtA na A gataM sAkaM sUryasya rashmibhiH
arvAñcA vAM saptayo.adhvarashriyo vahantu savanedupa
iSaM pRñcantA sukRte sudAnava A barhiH sIdataM narA
tena nAsatyA gataM rathena sUryatvacA
yena shashvadUhathurdAshuSe vasu madhvaH somasya pItaye
ukthebhirarvAgavase purUvasU arkaishca ni hvayAmahe
shashvat kaNvAnAM sadasi priye hi kaM somaM papathurashvinA