HYMN 118

A vAM ratho ashvinA shyenapatvA sumRLIkaH svavAn yAtvarvAM
yo martyasya manaso javIyAn trivandhuro vRSaNA vAtaraMhAH
trivandhureNa trivRtA rathena tricakreNa suvRtA yAtamarvAk
pinvataM gA jinvatamarvato no vardhayatamashvinA vIramasme
pravadyAmanA suvRtA rathena dasrAvimaM shRNutaM shlokamadreH
kimaN^ga vAM pratyavartiM gamiSThAhurviprAsoashvinA purAjAH
A vAM shyenAso ashvinA vahantu rathe yuktAsa AshavaH pataMgAH
ye apturo divyAso na gRdhrA abhi prayo nAsatyA vahanti
A vAM rathaM yuvatistiSThadatra juSTvI narA duhitAsUryasya
pari vAmashvA vapuSaH pataMgA vayo vahantvaruSA abhIke
ud vandanamairataM daMsanAbhirud rebhaM dasrA vRSaNA shacIbhiH
niS TaugryaM pArayathaH samudrAt punashcyavAnaM cakrathuryuvAnam
yuvamatraye.avanItAya taptamUrjamomAnamashvinAvadhattam
yuvaM kaNvAyApiriptAya cakSuH pratyadhattaM suSTutiM jujuSANA
yuvaM dhenuM shayave nAdhitAyApinvatamashvinA pUrvyAya
amuñcataM vartikAmaMhaso niH prati jaN^ghAM vishpalAyA adhattam
yuvaM shvetaM pedava indrajUtamahihanamashvinAdattamashvam
johUtramaryo abhibhUtimugraM sahasrasAM vRSaNaM vIDvaN^gam
tA vAM narA svavase sujAtA havAmahe ashvinA nAdhamAnAH
A na upa vasumatA rathena giro jusAnA suvitAya yAtam
A shyenasya javasA nUtanenAsme yAtaM nAsatyA sajoSAH
have hi vAmashvinA rAtahavyaH shashvattamAyA uSaso vyuSTau