HYMN 7

ayam iha prathamo dhAyi dhAtRbhir hotA yajiSTho adhvareSv IDyaH |
yam apnavAno bhRgavo virurucur vaneSu citraM vibhvaM vishe-vishe ||
agne kadA ta AnuSag bhuvad devasya cetanam |
adhA hi tvA jagRbhrire martAso vikSv IDyam ||
RtAvAnaM vicetasam pashyanto dyAm iva stRbhiH |
vishveSAm adhvarANAM haskartAraM dame-dame ||
AshuM dUtaM vivasvato vishvA yash carSaNIr abhi |
A jabhruH ketum Ayavo bhRgavANaM vishe-vishe ||
tam IM hotAram AnuSak cikitvAMsaM ni Sedire |
raNvam pAvakashociSaM yajiSThaM sapta dhAmabhiH ||
taM shashvatISu mAtRSu vana A vItam ashritam |
citraM santaM guhA hitaM suvedaM kUcidarthinam ||
sasasya yad viyutA sasminn Udhann Rtasya dhAman raNayanta devAH |
mahAM agnir namasA rAtahavyo ver adhvarAya sadam id RtAvA ||
ver adhvarasya dUtyAni vidvAn ubhe antA rodasI saMcikitvAn |
dUta Iyase pradiva urANo viduSTaro diva ArodhanAni ||
kRSNaM ta ema rushataH puro bhAsh cariSNv arcir vapuSAm id ekam |
yad apravItA dadhate ha garbhaM sadyash cij jAto bhavasId u dUtaH ||
sadyo jAtasya dadRshAnam ojo yad asya vAto anuvAti shociH |
vRNakti tigmAm ataseSu jihvAM sthirA cid annA dayate vi jambhaiH ||
tRSu yad annA tRSuNA vavakSa tRSuM dUtaM kRNute yahvo agniH |
vAtasya meLiM sacate nijUrvann AshuM na vAjayate hinve arvA ||