HYMN 24

kA suSTutiH shavasaH sUnum indram arvAcInaM rAdhasa A vavartat |
dadir hi vIro gRNate vasUni sa gopatir niSSidhAM no janAsaH ||
sa vRtrahatye havyaH sa IDyaH sa suSTuta indraH satyarAdhAH |
sa yAmann A maghavA martyAya brahmaNyate suSvaye varivo dhAt ||
tam in naro vi hvayante samIke ririkvAMsas tanvaH kRNvata trAm |
mitho yat tyAgam ubhayAso agman naras tokasya tanayasya sAtau ||
kratUyanti kSitayo yoga ugrAshuSANAso mitho arNasAtau |
saM yad visho 'vavRtranta yudhmA Ad in nema indrayante abhIke ||
Ad id dha nema indriyaM yajanta Ad it paktiH puroLAshaM riricyAt |
Ad it somo vi papRcyAd asuSvIn Ad ij jujoSa vRSabhaM yajadhyai ||
kRNoty asmai varivo ya itthendrAya somam ushate sunoti |
sadhrIcInena manasAvivenan tam it sakhAyaM kRNute samatsu ||
ya indrAya sunavat somam adya pacAt paktIr uta bhRjjAti dhAnAH |
prati manAyor ucathAni haryan tasmin dadhad vRSaNaM shuSmam indraH ||
yadA samaryaM vy aced RghAvA dIrghaM yad Ajim abhy akhyad aryaH |
acikradad vRSaNam patny achA duroNa A nishitaM somasudbhiH ||
bhUyasA vasnam acarat kanIyo 'vikrIto akAniSam punar yan |
sa bhUyasA kanIyo nArirecId dInA dakSA vi duhanti pra vANam ||
ka imaM dashabhir mamendraM krINAti dhenubhiH |
yadA vRtrANi jaN^ghanad athainam me punar dadat ||
nU STuta indra nU gRNAna iSaM jaritre nadyo na pIpeH |
akAri te harivo brahma navyaM dhiyA syAma rathyaH sadAsAH ||