HYMN 45
eSa sya bhAnur ud iyarti yujyate rathaH parijmA divo asya sAnavi |
pRkSAso asmin mithunA adhi trayo dRtis turIyo madhuno vi rapshate ||
ud vAm pRkSAso madhumanta Irate rathA ashvAsa uSaso vyuSTiSu |
aporNuvantas tama A parIvRtaM svar Na shukraM tanvanta A rajaH ||
madhvaH pibatam madhupebhir Asabhir uta priyam madhune yuñjAthAM ratham |
A vartanim madhunA jinvathas patho dRtiM vahethe madhumantam ashvinA ||
haMsAso ye vAm madhumanto asridho hiraNyaparNA uhuva uSarbudhaH |
udapruto mandino mandinispRsho madhvo na makSaH savanAni gachathaH ||
svadhvarAso madhumanto agnaya usrA jarante prati vastor ashvinA |
yan niktahastas taraNir vicakSaNaH somaM suSAva madhumantam adribhiH ||
AkenipAso ahabhir davidhvataH svar Na shukraM tanvanta A rajaH |
sUrash cid ashvAn yuyujAna Iyate vishvAM anu svadhayA cetathas pathaH ||
pra vAm avocam ashvinA dhiyaMdhA rathaH svashvo ajaro yo asti |
yena sadyaH pari rajAMsi yAtho haviSmantaM taraNim bhojam acha ||
|