HYMN 55

ko vas trAtA vasavaH ko varUtA dyAvAbhUmI adite trAsIthAM naH |
sahIyaso varuNa mitra martAt ko vo 'dhvare varivo dhAti devAH ||
pra ye dhAmAni pUrvyANy arcAn vi yad uchAn viyotAro amUrAH |
vidhAtAro vi te dadhur ajasrA RtadhItayo rurucanta dasmAH ||
pra pastyAm aditiM sindhum arkaiH svastim ILe sakhyAya devIm |
ubhe yathA no ahanI nipAta uSAsAnaktA karatAm adabdhe ||
vy aryamA varuNash ceti panthAm iSas patiH suvitaM gAtum agniH |
indrAviSNU nRvad u Su stavAnA sharma no yantam amavad varUtham ||
A parvatasya marutAm avAMsi devasya trAtur avri bhagasya |
pAt patir janyAd aMhaso no mitro mitriyAd uta na uruSyet ||
nU rodasI ahinA budhnyena stuvIta devI apyebhir iSTaiH |
samudraM na saMcaraNe saniSyavo gharmasvaraso nadyo apa vran ||
devair no devy aditir ni pAtu devas trAtA trAyatAm aprayuchan |
nahi mitrasya varuNasya dhAsim arhAmasi pramiyaM sAnv agneH ||
agnir Ishe vasavyasyAgnir mahaH saubhagasya |
tAny asmabhyaM rAsate ||
uSo maghony A vaha sUnRte vAryA puru |
asmabhyaM vAjinIvati ||
tat su naH savitA bhago varuNo mitro aryamA |
indro no rAdhasA gamat ||