Book 5

HYMN 1

abodhy agniH samidhA janAnAm prati dhenum ivAyatIm uSAsam |
yahvA iva pra vayAm ujjihAnAH pra bhAnavaH sisrate nAkam acha ||
abodhi hotA yajathAya devAn Urdhvo agniH sumanAH prAtar asthAt |
samiddhasya rushad adarshi pAjo mahAn devas tamaso nir amoci ||
yad IM gaNasya rashanAm ajIgaH shucir aN^kte shucibhir gobhir agniH |
Ad dakSiNA yujyate vAjayanty uttAnAm Urdhvo adhayaj juhUbhiH ||
agnim achA devayatAm manAMsi cakSUMSIva sUrye saM caranti |
yad IM suvAte uSasA virUpe shveto vAjI jAyate agre ahnAm ||
janiSTa hi jenyo agre ahnAM hito hiteSv aruSo vaneSu |
dame-dame sapta ratnA dadhAno 'gnir hotA ni SasAdA yajIyAn ||
agnir hotA ny asIdad yajIyAn upasthe mAtuH surabhA uloke |
yuvA kaviH puruniSTha RtAvA dhartA kRSTInAm uta madhya iddhaH ||
pra Nu tyaM vipram adhvareSu sAdhum agniM hotAram ILate namobhiH |
A yas tatAna rodasI Rtena nityam mRjanti vAjinaM ghRtena ||
mArjAlyo mRjyate sve damUnAH kaviprashasto atithiH shivo naH |
sahasrashRN^go vRSabhas tadojA vishvAM agne sahasA prAsy anyAn ||
pra sadyo agne aty eSy anyAn Avir yasmai cArutamo babhUtha |
ILenyo vapuSyo vibhAvA priyo vishAm atithir mAnuSINAm ||
tubhyam bharanti kSitayo yaviSTha balim agne antita ota dUrAt |
A bhandiSThasya sumatiM cikiddhi bRhat te agne mahi sharma bhadram ||
Adya ratham bhAnumo bhAnumantam agne tiSTha yajatebhiH samantam |
vidvAn pathInAm urv antarikSam eha devAn haviradyAya vakSi ||
avocAma kavaye medhyAya vaco vandAru vRSabhAya vRSNe |
gaviSThiro namasA stomam agnau divñva rukmam uruvyañcam ashret ||