HYMN 45

vidA divo viSyann adrim ukthair AyatyA uSaso arcino guH |
apAvRta vrajinIr ut svar gAd vi duro mAnuSIr deva AvaH ||
vi sUryo amatiM na shriyaM sAd orvAd gavAm mAtA jAnatI gAt |
dhanvarNaso nadyaH khAdoarNA sthUNeva sumitA dRMhata dyauH ||
asmA ukthAya parvatasya garbho mahInAM januSe pUrvyAya |
vi parvato jihIta sAdhata dyaur AvivAsanto dasayanta bhUma ||
sUktebhir vo vacobhir devajuSTair indrA nv agnI avase huvadhyai |
ukthebhir hi SmA kavayaH suyajñA AvivAsanto maruto yajanti ||
eto nv adya sudhyo bhavAma pra duchunA minavAmA varIyaH |
Are dveSAMsi sanutar dadhAmAyAma prAñco yajamAnam acha ||
etA dhiyaM kRNavAmA sakhAyo 'pa yA mAtAM RNuta vrajaM goH |
yayA manur vishishipraM jigAya yayA vaNig vaN^kur ApA purISam ||
anUnod atra hastayato adrir Arcan yena dasha mAso navagvAH |
RtaM yatI saramA gA avindad vishvAni satyAN^girAsh cakAra ||
vishve asyA vyuSi mAhinAyAH saM yad gobhir aN^giraso navanta |
utsa AsAm parame sadhastha Rtasya pathA saramA vidad gAH ||
A sUryo yAtu saptAshvaH kSetraM yad asyorviyA dIrghayAthe |
raghuH shyenaH patayad andho achA yuvA kavir dIdayad goSu gachan ||
A sUryo aruhac chukram arNo 'yukta yad dharito vItapRSThAH |
udnA na nAvam anayanta dhIrA AshRNvatIr Apo arvAg atiSThan ||
dhiyaM vo apsu dadhiSe svarSAM yayAtaran dasha mAso navagvAH |
ayA dhiyA syAma devagopA ayA dhiyA tuturyAmAty aMhaH ||