HYMN 51

agne sutasya pItaye vishvair Umebhir A gahi |
devebhir havyadAtaye ||
RtadhItaya A gata satyadharmANo adhvaram |
agneH pibata jihvayA ||
viprebhir vipra santya prAtaryAvabhir A gahi |
devebhiH somapItaye ||
ayaM somash camU suto 'matre pari Sicyate |
priya indrAya vAyave ||
vAyav A yAhi vItaye juSANo havyadAtaye |
pibA sutasyAndhaso abhi prayaH ||
indrash ca vAyav eSAM sutAnAm pItim arhathaH |
tAñ juSethAm arepasAv abhi prayaH ||
sutA indrAya vAyave somAso dadhyAshiraH |
nimnaM na yanti sindhavo 'bhi prayaH ||
sajUr vishvebhir devebhir ashvibhyAm uSasA sajUH |
A yAhy agne atrivat sute raNa ||
sajUr mitrAvaruNAbhyAM sajUH somena viSNunA |
A yAhy agne atrivat sute raNa ||
sajUr Adityair vasubhiH sajUr indreNa vAyunA |
A yAhy agne atrivat sute raNa ||
svasti no mimItAm ashvinA bhagaH svasti devy aditir anarvaNaH |
svasti pUSA asuro dadhAtu naH svasti dyAvApRthivI sucetunA ||
svastaye vAyum upa bravAmahai somaM svasti bhuvanasya yas patiH |
bRhaspatiM sarvagaNaM svastaye svastaya AdityAso bhavantu naH ||
vishve devA no adyA svastaye vaishvAnaro vasur agniH svastaye |
devA avantv RbhavaH svastaye svasti no rudraH pAtv aMhasaH ||
svasti mitrAvaruNA svasti pathye revati |
svasti na indrash cAgnish ca svasti no adite kRdhi ||
svasti panthAm anu carema sUryAcandramasAv iva |
punar dadatAghnatA jAnatA saM gamemahi ||