HYMN 55

prayajyavo maruto bhrAjadRSTayo bRhad vayo dadhire rukmavakSasaH |
Iyante ashvaiH suyamebhir AshubhiH shubhaM yAtAm anu rathA avRtsata ||
svayaM dadhidhve taviSIM yathA vida bRhan mahAnta urviyA vi rAjatha |
utAntarikSam mamire vy ojasA shubhaM yAtAm anu rathA avRtsata ||
sAkaM jAtAH subhvaH sAkam ukSitAH shriye cid A prataraM vAvRdhur naraH |
virokiNaH sUryasyeva rashmayaH shubhaM yAtAm anu rathA avRtsata ||
AbhUSeNyaM vo maruto mahitvanaM didRkSeNyaM sUryasyeva cakSaNam |
uto asmAM amRtatve dadhAtana shubhaM yAtAm anu rathA avRtsata ||
ud IrayathA marutaH samudrato yUyaM vRSTiM varSayathA purISiNaH |
na vo dasrA upa dasyanti dhenavaH shubhaM yAtAm anu rathA avRtsata ||
yad ashvAn dhUrSu pRSatIr ayugdhvaM hiraNyayAn praty atkAM amugdhvam |
vishvA it spRdho maruto vy asyatha shubhaM yAtAm anu rathA avRtsata ||
na parvatA na nadyo varanta vo yatrAcidhvam maruto gachathed u tat |
uta dyAvApRthivI yAthanA pari shubhaM yAtAm anu rathA avRtsata ||
yat pUrvyam maruto yac ca nUtanaM yad udyate vasavo yac ca shasyate |
vishvasya tasya bhavathA navedasaH shubhaM yAtAm anu rathA avRtsata ||
mRLata no maruto mA vadhiSTanAsmabhyaM sharma bahulaM vi yantana |
adhi stotrasya sakhyasya gAtana shubhaM yAtAm anu rathA avRtsata ||
yUyam asmAn nayata vasyo achA nir aMhatibhyo maruto gRNAnAH |
juSadhvaM no havyadAtiM yajatrA vayaM syAma patayo rayINAm ||