HYMN 63

Rtasya gopAv adhi tiSThatho rathaM satyadharmANA parame vyomani |
yam atra mitrAvaruNAvatho yuvaM tasmai vRSTir madhumat pinvate divaH ||
samrAjAv asya bhuvanasya rAjatho mitrAvaruNA vidathe svardRshA |
vRSTiM vAM rAdho amRtatvam Imahe dyAvApRthivI vi caranti tanyavaH ||
samrAjA ugrA vRSabhA divas patI pRthivyA mitrAvaruNA vicarSaNI |
citrebhir abhrair upa tiSThatho ravaM dyAM varSayatho asurasya mAyayA ||
mAyA vAm mitrAvaruNA divi shritA sUryo jyotish carati citram Ayudham |
tam abhreNa vRSTyA gUhatho divi parjanya drapsA madhumanta Irate ||
rathaM yuñjate marutaH shubhe sukhaM shUro na mitrAvaruNA gaviSTiSu |
rajAMsi citrA vi caranti tanyavo divaH samrAjA payasA na ukSatam ||
vAcaM su mitrAvaruNAv irAvatIm parjanyash citrAM vadati tviSImatIm |
abhrA vasata marutaH su mAyayA dyAM varSayatam aruNAm arepasam ||
dharmaNA mitrAvaruNA vipashcitA vratA rakSethe asurasya mAyayA |
Rtena vishvam bhuvanaM vi rAjathaH sUryam A dhattho divi citryaM ratham ||