HYMN 73

yad adya sthaH parAvati yad arvAvaty ashvinA |
yad vA purU purubhujA yad antarikSa A gatam ||
iha tyA purubhUtamA purU daMsAMsi bibhratA |
varasyA yAmy adhrigU huve tuviSTamA bhuje ||
IrmAnyad vapuSe vapush cakraM rathasya yemathuH |
pary anyA nAhuSA yugA mahnA rajAMsi dIyathaH ||
tad U Su vAm enA kRtaM vishvA yad vAm anu STave |
nAnA jAtAv arepasA sam asme bandhum eyathuH ||
A yad vAM sUryA rathaM tiSThad raghuSyadaM sadA |
pari vAm aruSA vayo ghRNA varanta AtapaH ||
yuvor atrish ciketati narA sumnena cetasA |
gharmaM yad vAm arepasaM nAsatyAsnA bhuraNyati ||
ugro vAM kakuho yayiH shRNve yAmeSu saMtaniH |
yad vAM daMsobhir ashvinAtrir narAvavartati ||
madhva U Su madhUyuvA rudrA siSakti pipyuSI |
yat samudrAti parSathaH pakvAH pRkSo bharanta vAm ||
satyam id vA u ashvinA yuvAm Ahur mayobhuvA |
tA yAman yAmahUtamA yAmann A mRLayattamA ||
imA brahmANi vardhanAshvibhyAM santu shaMtamA |
yA takSAma rathAM ivAvocAma bRhan namaH ||