HYMN 75
prati priyatamaM rathaM vRSaNaM vasuvAhanam |
stotA vAm ashvinAv RSi stomena prati bhUSati mAdhvI mama shrutaM havam ||
atyAyAtam ashvinA tiro vishvA ahaM sanA |
dasrA hiraNyavartanI suSumnA sindhuvAhasA mAdhvI mama shrutaM havam ||
A no ratnAni bibhratAv ashvinA gachataM yuvam |
rudrA hiraNyavartanI juSANA vAjinIvasU mAdhvI mama shrutaM havam ||
suSTubho vAM vRSaNvasU rathe vANIcy AhitA |
uta vAM kakuho mRgaH pRkSaH kRNoti vApuSo mAdhvI mama shrutaM havam ||
bodhinmanasA rathyeSirA havanashrutA |
vibhish cyavAnam ashvinA ni yAtho advayAvinam mAdhvI mama shrutaM havam ||
A vAM narA manoyujo 'shvAsaH pruSitapsavaH |
vayo vahantu pItaye saha sumnebhir ashvinA mAdhvI mama shrutaM havam ||
ashvinAv eha gachataM nAsatyA mA vi venatam |
tirash cid aryayA pari vartir yAtam adAbhyA mAdhvI mama shrutaM havam ||
asmin yajñe adAbhyA jaritAraM shubhas patI |
avasyum ashvinA yuvaM gRNantam upa bhUSatho mAdhvI mama shrutaM havam ||
abhUd uSA rushatpashur Agnir adhAyy RtviyaH |
ayoji vAM vRSaNvasU ratho dasrAv amartyo mAdhvI mama shrutaM havam ||
|