HYMN 79

mahe no adya bodhayoSo rAye divitmatI |
yathA cin no abodhayaH satyashravasi vAyye sujAte ashvasUnRte ||
yA sunIthe shaucadrathe vy aucho duhitar divaH |
sA vy ucha sahIyasi satyashravasi vAyye sujAte ashvasUnRte ||
sA no adyAbharadvasur vy uchA duhitar divaH |
yo vy auchaH sahIyasi satyashravasi vAyye sujAte ashvasUnRte ||
abhi ye tvA vibhAvari stomair gRNanti vahnayaH |
maghair maghoni sushriyo dAmanvantaH surAtayaH sujAte ashvasUnRte ||
yac cid dhi te gaNA ime chadayanti maghattaye |
pari cid vaSTayo dadhur dadato rAdho ahrayaM sujAte ashvasUnRte ||
aiSu dhA vIravad yasha uSo maghoni sUriSu |
ye no rAdhAMsy ahrayA maghavAno arAsata sujAte ashvasUnRte ||
tebhyo dyumnam bRhad yasha uSo maghony A vaha |
ye no rAdhAMsy ashvyA gavyA bhajanta sUrayaH sujAte ashvasUnRte ||
uta no gomatIr iSa A vahA duhitar divaH |
sAkaM sUryasya rashmibhiH shukraiH shocadbhir arcibhiH sujAte ashvasUnRte ||
vy uchA duhitar divo mA ciraM tanuthA apaH |
net tvA stenaM yathA ripuM tapAti sUro arciSA sujAte ashvasUnRte ||
etAvad ved uSas tvam bhUyo vA dAtum arhasi |
yA stotRbhyo vibhAvary uchantI na pramIyase sujAte ashvasUnRte ||