HYMN 85

pra samrAje bRhad arcA gabhIram brahma priyaM varuNAya shrutAya |
vi yo jaghAna shamiteva carmopastire pRthivIM sUryAya ||
vaneSu vy antarikSaM tatAna vAjam arvatsu paya usriyAsu |
hRtsu kratuM varuNo apsv agniM divi sUryam adadhAt somam adrau ||
nIcInabAraM varuNaH kavandham pra sasarja rodasI antarikSam |
tena vishvasya bhuvanasya rAjA yavaM na vRSTir vy unatti bhUma ||
unatti bhUmim pRthivIm uta dyAM yadA dugdhaM varuNo vaSTy Ad it |
sam abhreNa vasata parvatAsas taviSIyantaH shrathayanta vIrAH ||
imAm U Sv Rsurasya shrutasya mahIm mAyAM varuNasya pra vocam |
mAneneva tasthivAM antarikSe vi yo mame pRthivIM sUryeNa ||
imAm U nu kavitamasya mAyAm mahIM devasya nakir A dadharSa |
ekaM yad udnA na pRNanty enIr AsiñcantIr avanayaH samudram ||
aryamyaM varuNa mitryaM vA sakhAyaM vA sadam id bhrAtaraM vA |
veshaM vA nityaM varuNAraNaM vA yat sIm Agash cakRmA shishrathas tat ||
kitavAso yad riripur na dIvi yad vA ghA satyam uta yan na vidma |
sarvA tA vi Sya shithireva devAdhA te syAma varuNa priyAsaH ||