HYMN 5

prAgnaye tavase bharadhvaM giraM divo arataye pRthivyAH
yo vishveSAmamRtAnAmupasthe vaishvAnaro vAvRdhe jAgRvadbhiH
pRSTo divi dhAyyagniH pRthivyAM netA sindhUnAM vRSabha stiyAnAm
sa mAnuSIrabhi visho vi bhAti vaishvAnaro vAvRdhAno vareNa
tvad bhiyA visha AyannasiknIrasamanA jahatIrbhojanAni
vaishvAnara pUrave shoshucAnaH puro yadagne darayannadIdeH
tava tridhAtu pRthivI uta dyaurvaishvAnara vratamagne sacanta
tvaM bhAsA rodasI A tatanthAjasreNa shociSA shoshucAnaH
tvAmagne harito vAvashAnA giraH sacante dhunayo ghRtAcIH
patiM kRSTInAM rathyaM rayINAM vaishvAnaramuSasAM ketumahnAm
tve asuryaM vasavo ny RNvan kratuM hi te mitramaho juSanta
tvaM dasyUnrokaso agna Aja uru jyotirjanayannAryAya
sa jAyamAnaH parame vyoman vAyurna pAthaH pari pAsi sadyaH
tvaM bhuvanA janayannabhi krannapatyAya jAtavedo dashasyan
tAmagne asme iSamerayasva vaishvAnara dyumatIM jAtavedaH
yayA rAdhaH pinvasi vishvavAra pRthu shravo dAshuSe martyAya
taM no agne maghavadbhyaH purukSuM rayiM ni vAjaM shrutyaM yuvasva
vaishvAnara mahi naH sharma yacha rudrebhiragne vasubhiH sajoSAH