HYMN 34

pra shukraitu devI manISA asmat sutaSTo ratho na vAjI
viduH pRthivyA divo janitraM shRNvantyApo adha kSarantIH
Apashcidasmai pinvanta pRthvIrvRtreSu shUrA maMsanta ugrAH
A dhUrSvasmai dadhAtAshvAnindro na vajrI hiraNyabAhuH
abhi pra sthAtAheva yajñaM yAteva patman tmanA hinota
tmanA samatsu hinota yajñaM dadhAta ketuM janAya vIram
udasya shuSmAd bhAnurnArta bibharti bhAraM pRthivI nabhUma
hvayAmi devAnayAturagne sAdhannRtena dhiyaM dadhAmi
abhi vo devIM dhiyaM dadhidhvaM pra vo devatrA vAcaM kRNudhvam
A caSTa AsAM pAtho nadInAM varuNa ugraH sahasracakSAH
rAjA rASTrAnAM pesho nadInAmanuttamasmai kSatraM vishvAyu
aviSTo asmAn vishvAsu vikSvadyuM kRNota shaMsaM ninitsoH
vyetu didyud dviSAmashevA yuyota viSvag rapastanUnAm
avIn no agnirhavyAn namobhiH preSTho asmA adhAyi stomaH
sajUrdevebhirapAM napAtaM sakhAyaM kRdhvaM shivo no astu
abjAmukthairahiM gRNISe budhne nadInAM rajassu SIdan
mA no.ahirbudhnyo riSe dhAn mA yajño asya sridhad RtAyoH
uta na eSu nRSu shravo dhuH pra rAye yantu shardhanto aryaH
tapanti shatruM svarNa bhUmA mahAsenAso amebhireSAm
A yan naH patnIrgamantyachA tvaSTA supANirdadhAtuvIrAn
prati na stomaM tvaSTA juSeta syAdasme aramatirvasUyuH
tA no rAsan rAtiSAco vasUnyA rodasI varuNAnI shRNotu
varUtrIbhiH susharaNo no astu tvaSTA sudatro vi dadhAtu rAyaH
tan no rAyaH parvatAstan na Apastad rAtiSAca oSadhIruta dyauH
vanaspatibhiH pRthivI sajoSA ubhe rodasI pari pAsato naH
anu tadurvI rodasI jihAtAmanu dyukSo varuNa indrasakhA
anu vishve maruto ye sahAso rAyaH syAma dharuNaM dhiyadhyai
tan na indro varuNo mitro agnirApa oSadhIrvanino juSanta
sharman syAma marutAmupasthe yUyaM pAta ...