HYMN 8

A no vishvAbhirUtibhirashvinA gachataM yuvam
dasrA hiraNyavartanI pibataM somyaM madhu
A nUnaM yAtamashvinA rathena sUryatvacA
bhujI hiraNyapeshasA kavI gambhIracetasA
A yAtaM nahuSas paryAntarikSAt suvRktibhiH
pibAthoashvinA madhu kaNvAnAM savane sutam
A no yAtaM divas paryAntarikSAdadhapriyA
putraH kaNvasya vAmiha suSAva somyaM madhu
A no yAtamupashrutyashvinA somapItaye
svAhA stomasya vardhanA pra kavI dhItibhirnarA
yaccid dhi vAM pura RSayo juhUre.avase narA
A yAtamashvinA gatamupemAM suSTutiM mama
divashcid rocanAdadhyA no gantaM svarvidA
dhIbhirvatsapracetasA stomebhirhavanashrutA
kimanye paryAsate.asmat stomebhirashvinA
putraH kaNvasya vAM RSirgIrbhirvatso avIvRdhat
A vAM vipra ihAvase.ahvat stomebhirashvinA
ariprA vRtrahantamA tA no bhUtaM mayobhuvA
A yad vAM yoSaNA rathamatiSThad vAjinIvasU
vishvAnyashvinA yuvaM pra dhItAnyagachatam
ataH sahasranirNijA rathenA yAtamashvinA
vatso vAM madhumad vaco.ashaMsIt kAvyaH kaviH
purumandrA purUvasU manotarA rayINAm
stomaM me ashvinAvimamabhi vahnI anUSAtAm
A no vishvAnyashvinA dhattaM rAdhAMsyahrayA
kRtaM na RtviyAvato mA no rIradhataM nide
yan nAastyA parAvati yad vA stho adhyambare
ataH sahasranirNijA rathenA yAtamashvinA
yo vAM nAsatyAv RSirgIrbhirvatso avIvRdhat
tasmai sahasranirNijamiSaM dhattaM ghRtashcutam
prAsmA UrjaM ghRtashcutamashvinA yachataM yuvam
yo vAM sumnAya tuSTavad vasUyAd dAnunas patI
A no gantaM rishAdasemaM stomaM purubhujA
kRtaM naH sushriyo naremA dAtamabhiSTaye
A vAM vishvAbhirUtibhiH priyamedhA ahUSata
rAjantAvadhvarANAmashvinA yAmahUtiSu
A no gantaM mayobhuvAshvinA shambhuvA yuvam
yo vAM vipanyU dhItibhirgIrbhirvatso avIvRdhat
yAbhiH kaNvaM medhAtithiM yAbhirvashaM dashavrajam
yAbhirgosharyamAvataM tAbhirno.avataM narA
yAbhirnarA trasadasyumAvataM kRtvye dhane
tAbhiH SvasmAnashvinA prAvataM vAjasAtaye
pra vAM stomAH suvRktayo giro vardhantvashvinA
purutrA vRtrahantamA tA no bhUtaM puruspRhA
trINi padAnyashvinorAviH sAnti guhA paraH
kavI Rtasya patmabhirarvAg jIvebhyas pari