HYMN 27
agnirukthe purohito grAvANo barhiradhvare
RcA yAmi maruto brahmaNas patiM devAnavo vareNyam
A pashuM gAsi pRthivIM vanaspatInuSAsA naktamoSadhIH
vishve ca no vasavo vishvavedaso dhInAM bhUta prAvitAraH
pra sU na etvadhvaro.agnA deveSu pUrvyaH
AdityeSu pra varuNe dhRtavrate marutsu vishvabhAnuSu
vishve hi SmA manave vishvavedaso bhuvan vRdhe rishAdasaH
ariSTebhiH pAyubhirvishvavedaso yantA no.avRkaM chardiH
A no adya samanaso gantA vishve sajoSasaH
RcA girA maruto devyadite sadane pastye mahi
abhi priyA maruto yA vo ashvyA havyA mitra prayAthana
Abarhirindro varuNasturA nara AdityAso sadantu naH
vayaM vo vRktabarhiSo hitaprayasa AnuSak
sutasomAso varuNa havAmahe manuSvadiddhAgnayaH
A pra yAta maruto viSNo ashvinA pUSan mAkInayA dhiyA
indra A yAtu prathamaH saniSyubhirvRSA yo vRtrahA gRNe
vi no devAso adruho.achidraM sharma yachata
na yad dUrAd vasavo nU cidantito varUthamAdadharSati
asti hi vaH sajAtyaM rishAdaso devAso astyApyam
pra NaH pUrvasmai suvitAya vocata makSU sumnAya navyase
idA hi va upastutimidA vAmasya bhaktaye
upa vo vishvavedaso namasyurAnasRkSyanyAmiva
udu Sya vaH savitA supraNItayo.asthAdUrdhvo vareNyaH
ni dvipAdashcatuSpAdo arthino.avishran patayiSNavaH
devaM\-devaM vo.avase devaM\-devamabhiSTaye
devaM\-devaM huvema vAjasAtaye gRNanto devyA dhiyA
devAso hi SmA manave samanyavo vishve sAkaM sarAtayaH
te no adya te aparaM tuce tu no bhavantu varivovidaH
pra vaH shaMsAmyadruhaH saMstha upastutInAm
na taM dhUrtirvaruNa mitra martyaM yo vo dhAmabhyo.avidhat
pra sa kSayaM tirate vi mahIriSo yo vo varAya dAshati
pra prajAbhirjAyate dharmaNas paryariSTaH sarva edhate
Rte sa vindate yudhaH sugebhiryAtyadhvanaH
aryamA mitrovaruNaH sarAtayo yaM trAyante sajoSasaH
ajre cidasmai kRNuthA nyañcanaM durge cidA susaraNam
eSA cidasmAdashaniH paro nu sAsredhantI vi nashyatu
yadadya sUrya udyati priyakSatrA RtaM dadha
yan nimruci prabudhi vishvavedaso yad vA madhyandine divaH
yad vAbhipitve asurA RtaM yate chardiryema vi dAshuSe
vayaM tad vo vasavo vishvavedasa upa stheyAma madhya A
yadadya sUra udite yan madhyandina Atuci
vAmaM dhattha manave vishvavedaso juhvAnAya pracetase
vayaM tad vaH samrAja A vRNImahe putro na bahupAyyam
ashyAma tadAdityA juhvato haviryena vasyo.anashAmahai
|