HYMN 23

tIvrAH somAsa A gahyAshIrvantaH sutA ime
vAyo tAn prasthitAn piba
ubhA devA divispRshendravAyU havAmahe
asya somasya pItaye
indravAyU manojuvA viprA havanta Utaye
sahasrAkSA dhiyas patI
mitraM vayaM havAmahe varuNaM somapItaye
jajñAnA pUtadakSasA
Rtena yAv RtAvRdhAv Rtasya jyotiSas patI
tA mitrAvaruNA huve
varuNaH prAvitA bhuvan mitro vishvAbhirUtibhiH
karatAM naH surAdhasaH
marutvantaM havAmaha indramA somapItaye
sajUrgaNena trimpatu
indrajyeSThA marudgaNA devAsaH pUSarAtayaH
vishve mama shrutA havam
hata vRtraM sudAnava indreNa sahasA yujA
mA no duHshaMsa Ishata
vishvAn devAn havAmahe marutaH somapItaye
ugrA hi pRshnimAtaraH
jayatAmiva tanyaturmarutAmeti dhRSNuyA
yacchubhaM yAthanA naraH
haskArAd vidyutas paryato jAtA avantu naH
maruto mRLayantu naH
A pUSañcitrabarhiSamAghRNe dharuNaM divaH
AjA naSTaM yathA pashum
pUSA rAjAnamAghRNirapagULhaM guhA hitam
avindaccitrabarhiSam
uto sa mahyamindubhiH SaD yuktAnanuseSidhat
gobhiryavaM na carkRSat
ambayo yantyadhvabhirjAmayo adhvarIyatAm
pRñcatIrmadhunA payaH
amUryA upa sUrye yAbhirvA sUryaH saha
tA no hinvantvadhvaram
apo devIrupa hvaye yatra gAvaH pibanti naH
sindubhyaH kartvaM haviH
apsvantaramRtamapsu bheSajamapAmuta prashastaye
devAbhavata vAjinaH
apsu me somo abravIdantarvishvAni bheSajA
agniM ca vishvashambhuvamApashca vishvabheSajIH
ApaH pRNIta bheSajaM varUthaM tanve mama
jyok ca sUryaM dRshe
idamApaH pra vahata yat kiM ca duritaM mayi
yad vAhamabhidudroha yad vA shepa utAnRtam
Apo adyAnvacAriSaM rasena samagasmahi
payasvAnagna Agahi taM mA saM sRja varcasA
saM mAgne varcasA sRja saM prajayA samAyuSA
vidyurmeasya devA indro vidyAt saha RSibhiH