HYMN 25

yaccid dhi te visho yathA pra deva varuNa vratam
minImasidyavi\-dyavi
mA no vadhAya hatnave jihILAnasya rIradhaH
mA hRNAnasya manyave
vi mRLIkAya te mano rathIrashvaM na sanditam
gIrbhirvaruNa sImahi
parA hi me vimanyavaH patanti vasyaiSTaye
vayo na vasatIrupa
kadA kSatrashriyaM naramA varuNaM karAmahe
mRLIkAyorucakSasam
tadit samAnamAshAte venantA na pra yuchataH
dhRtavratAya dAshuSe
vedA yo vInAM padamantarikSeNa patatAm
veda nAvaH samudriyaH
veda mAso dhRtavrato dvAdasha prajAvataH
vedA ya upajAyate
veda vAtasya vartanimurorRSvasya bRhataH
vedA ye adhyAsate
ni SasAda dhRtavrato varuNaH pastyAsvA
sAmrAjyAya sukratuH
ato vishvAnyadbhutA cikitvAnabhi pashyati
kRtAni yA cakartvA
sa no vishvAhA sukraturAdityaH supathA karat
pra Na AyUMSi tAriSat
bibhrad drApiM hiraNyayaM varuNo vasta nirNijam
pari spasho ni Sedire
na yaM dipsanti dipsavo na druhvANo janAnAm
na devamabhimAtayaH
uta yo mAnuSeSvA yashashcakre asAmyA
asmAkamudareSvA
parA me yanti dhItayo gAvo na gavyUtIranu
ichantIrurucakSasam
saM nu vocAvahai punaryato me madhvAbhRtam
hoteva kSadase priyam
darshaM nu vishvadarSataM darshaM rathamadhi kSami
etA juSata me giraH
imaM me varuNa shrudhI havamadyA ca mRLaya
tvAmavasyurA cake
tvaM vishvasya medhira divashca gmashca rAjasi
sa yAmaniprati shrudhi
uduttamaM mumugdhi no vi pAshaM madhyamaM cRta
avAdhamAni jIvase