7

Bei-ala sira nia hanorin

                ¹ Loron ida, eskriba no fariseu balun mai housi Jerusalem, hale’u Jesus. ² Sira hare katak Nia eskolante sira han ho liman foer, katak seidauk fase liman. ³ Ema fariseu no Judeu sira hotu la han wainhira sira seidauk fase di-diak sira nia lima, tuir lisan bei-ala sira nian. ⁴ Sira fila housi merkadu, sira la tur atu han wainhira sira la dauk fase an tuir sira nia lisan. Sira moris tuir lisan selu-seluk tan hanesan fase kopu, fase buli, solur sana riti. ⁵ Tan ne'e fariseu no eskriba sira husu, “Tan sa O nia eskolante sira la tuir bei-ala sira nia lisan, maibe sira han ho liman foer?” ⁶ Nia lia tun ba sira,  “Imi mesa laran makerek! Profeta Isaias koalia lo-los duni kona ba imi wainhira nia hakerek dehan, ‘Povu ida ne'e hanoin Ha’u ho deit ibun tutun, maibe nia laran dook los housi Ha’u. ⁷ Sira hahi Ha’u leet deit, maibe buat nebe sira hanorin mesa ema nian.’ ⁸ Husik tiha Maromak nia ukunfuan, imi tuir fali ema nia lisan, hodi fase kopu, fase buli no buat barak seluk tan hanesan ne'e.”

                ⁹ Nia dehan tan ba sira, “Imi hatene bobar Maromak nia ukunfuan atu halo tuir imi nia lisan sira, ¹⁰ Moises rasik dehan, ‘Hamtauk o nia aman no inan’ no ‘Ema nebe hateten aat nia aman ka nia inan sei mate.’ ¹¹ Imi fali dehan, ‘Ema ruma dehan ba nia aman ka nia inan karik: Buat nebe imi bele simu housi Ha’u mak korban, (katak, fo tiha  ona ba Maromak)’ ¹² imi la husik ona nia atu halo buat ruma atu tulun nia aman ka inan, ¹³ nune’e imi halo Maromak nia ukunfuan folin laek atu hametin fali imi nia lisan nebe imi fo sai ba imi nia oan sira.”

Buat nebe halo ema sai foer

                ¹⁴ Jesus bolu fali povu hodi dehan, “Imi hotu rona hodi komprende ba! ¹⁵ La iha buat ida iha liur nebe tama hodi halo foer ema nia laran, maibe buat nebe sai housi nia laran rasik mak halo foer ema. ¹⁶ Ema nebe iha tilun atu rona, rona ba!”                                

                ¹⁷ Wainhira Nia husik ema lubun ne'e no tama ona iha uma laran, nia eskolante sira husu nia kona ba aiknanoik ne'e. ¹⁸ Nia hatan ba sira , imi mos la komprende?  Imi la hare katak buat naran deit nebe tama iha ema nia laran housi liur la bele halo nia foer. ¹⁹ Basa la tama iha nia  fuan maibe iha nia kabun deit hodi sai ba liur.” Nune'e nia hatudu katak aihan hotu la foer. ²⁰ Nia simu tan, buat  nebe mai housi ema nia laran mak halo  nia sai foer,  ²¹ basa housi ema nia laran  mak mosu mai hakarak  aat nebe lori nia atu  halo  aat, atu na’ok, atu oho, halo sala foer, ²² atu sai karakten no halo  buat aat sira hanesan  lohi ema, hahalok foer, laran moras, lia bosok, loko an no hahalok beik. ²³ Buat sira ne'e hotu mai housi laran no halo foer ema.”

Feto ida nia fiar          

                ²⁴  Hafoin Jesus sai housi neba, la'o ba rai Tiro no Sidon. Nia tama iha uma ida, basa Nia lakohi katak ema ruma hatene. ²⁵ Feto ida rona kona ba Nia. Nia oan feto iha diabu iha nia laran. Feto ne'e hakbesik no tuku tur ba Nia. ²⁶ Nia ema gentiu nebe horik iha rai Siro Fenisia.  Nia husu Jesus atu duni sai diabu ne'e housi nia oan feto. ²⁷ Jesus dehan ba nia, “Husik uma-kain nia oan sira han di-diak lai. Hasai aihan housi labarik sira no fo fali ba asu sira, ne'e la diak.” ²⁸ Feto ne'e hatan, “Los duni, Na’i, maibe asu sira mos iha meja okos han buat nebe familia sira soe tiha.” ²⁹ Jesus dehan ba feto ne’e, “Tan o nia lia fuan sira ne'e, ba uma ona. Diabu sai tiha ona housi o nia oan.” ³⁰ Wainhira feto ne'e to'o uma, nia hetan nia oan feto toba hela iha tobafatin. Diabu la iha ona.

Jesus halo ema monok koalia

                ³¹ Tuir mai, Jesus sai housi rai Tiro, hodi la'o housi rai Sidon ba tasi Galileia, liu to'o baliza Dekapoli nian. ³² Sira lori ba nia ema tilun diuk no monok, hodi husu Nia atu tau liman ba nia. ³³ Hadook tiha ema ne'e housi ema lubun boot, Jesus hatama Nia limanfuan iha nia tilun, tafui hodi kona nia nanal, ³⁴ hafoin Nia hateke ba lalehan, dada iis hodi dehan ba nia, “Efeta,” katak “Loke ba.” ³⁵ Ema ne'e nia tilun nakloke kedas, no buat nebe halo nia ibun tos sai tiha. Nia hahu koalia mo-mos. ³⁶ Jesus bandu sira atu la bele fo hatene buat ne’e ba ema ruma, maibe liu Nia bandu sira, hetok sira fo hatene liu tan. ³⁷ Sira hahi Nia liu tan hodi dehan , “Nia halo tilun diuk sira mos rona monok sira koalia.”